नाशिक : येवला तालुक्यातून एक थरारक घटना समोर आली आहे. प्रेमविवाहाच्या रागातून मुलीकडच्या लोकांनी थेट लग्न मंडपातच नवरदेव आणि त्याच्या नातेवाईकांच्या अंगावर डिझेल ओतून त्यांना जिवंत जाळण्याचा प्रयत्न केला. या धक्कादायक प्रकारामुळे लग्नसमारंभात खळबळ उडाली.
येवल्यात राहणाऱ्या ऋषभ दीपक भगुंडे याचे निफाड तालुक्यातील रामपूर नैताळे येथील एका तरुणीसोबत प्रेमसंबंध होते. घरच्यांचा विरोध असल्याने या दोघांनी सप्टेंबर महिन्यातच घरच्यांच्या विरोधात जात कोर्ट मॅरेज केले होते. त्यानंतर आज येवल्यातील एका लॉन्समध्ये त्यांचा पारंपरिक पद्धतीने विवाह सोहळा आयोजित करण्यात आला होता. या आनंदाच्या वातावरणात लग्न विधी सुरू असतानाच अचानक मुलीकडचे काही नातेवाईक त्या ठिकाणी पोहोचले.
प्रेमविवाहाचा राग मनात धरून आलेल्या या लोकांनी सोबत आणलेल्या कॅनमधील डिझेल नवरदेव आणि त्याच्या वऱ्हाडी मंडळींच्या अंगावर ओतले. त्यांना पेटवून देण्याचा प्रयत्न करताच लग्नात एकच आरडाओरडा आणि भगदड उडाली. सुदैवाने, नवरदेवाच्या नातेवाईकांनी प्रसंगावधान राखत जोरदार प्रतिकार केला, ज्यामुळे एक मोठी दुर्घटना टळली.
या प्रकारानंतर संतापलेल्या दोन्ही गटांमध्ये लॉन्समध्येच तुंबळ हाणामारी झाली. उपस्थित लोकांनी हा सर्व थरार आपल्या मोबाईलच्या कॅमेऱ्यात कैद केला आहे. घटनेची माहिती मिळताच येवला शहर पोलिसांनी तातडीने घटनास्थळी धाव घेतली. पोलिसांनी काही संशयित आरोपींना ताब्यात घेतले असून, दोन्ही बाजूंनी गुन्हे नोंदवण्याचे काम सुरू आहे. या घटनेमुळे येवला परिसरात मोठी सनसनाटी पसरली आहे.
