पुणे : शिवसेना (उद्धव बाळासाहेब ठाकरे) पक्षाचे शाखाप्रमुख प्रदीप पूर्णेकर यांच्या हत्येप्रकरणामुळे आधीच वातावरण तापले असताना, आता त्यांच्या कुटुंबीयांना जीवे मारण्याच्या धमक्या येऊ लागल्या आहेत. प्रदीप पूर्णेकर यांच्या हत्येनंतर त्यांच्या कुटुंबीयांची भेट घेण्यासाठी राज्याचे परिवहन मंत्री तथा शिंदेसेनेचे नेते प्रताप सरनाईक त्यांच्या घरी पोहोचले होते. या भेटीदरम्यान पूर्णेकरांच्या पुतणीने केलेल्या एका दाव्याने सर्वत्र खळबळ उडाली.
प्रताप सरनाईक कुटुंबीयांचे सांत्वन करत असताना पूर्णेकर यांची पुतणी खुशबू पूर्णेकर हिने तिला आलेल्या धमकीचा खुलासा केला. तिला इन्स्टाग्रामवर एक धमकीचा मेसेज आला असून, त्यात ‘प्रदीप पूर्णेकरांनंतर पुढचं टार्गेट तू आहेस’ आणि ‘आता तुझा नंबर आहे’ असे म्हटले गेले आहे. या खळबळजनक खुलाशामुळे पूर्णेकर कुटुंब सध्या प्रचंड भीतीच्या छायेखाली जगत आहे.
याआधी, प्रदीप पूर्णेकर यांच्या कुटुंबीयांनी आरोपींना लवकरात लवकर फाशीची शिक्षा व्हावी आणि या प्रकरणात सहभागी असलेल्या इतर आरोपींनाही तात्काळ अटक करावी, अशी ठाम मागणी मंत्र्यांकडे केली होती. मात्र, कुटुंबातील मुलीलाच अशा प्रकारे थेट जीवे मारण्याची धमकी मिळाल्याने सुरक्षेचा मोठा प्रश्न निर्माण झाला आहे.
मंत्री प्रताप सरनाईक यांनी या प्रकरणाची गंभीर दखल घेत पूर्णेकर कुटुंबीयांना धीर दिला असून, त्यांना योग्य ती सुरक्षा आणि न्याय मिळवून देण्याचे आश्वासन दिले आहे. या घटनेमुळे ठाणे शहरात राजकीय वर्तुळात आणि नागरिकांमध्ये संताप व भीतीचे वातावरण पाहायला मिळत आहे. पोलीस प्रशासनाने या धमकीच्या मेसेजमागचा शोध घेऊन लवकरात लवकर कारवाई करावी, अशी मागणी जोर धरत आहे.
