पुणे: पुणे शहरात गुन्हेगारीच्या घटनांमध्ये वाढ होत असल्याचे चित्र पुन्हा एकदा समोर आले आहे. जुन्या वादातून एका 17 वर्षीय मुलावर टोळक्याने कोयत्याने जीवघेणा हल्ला केल्याची धक्कादायक घटना विश्रांतवाडी परिसरात घडली आहे. या हल्ल्यात तरुण गंभीर जखमी झाला. या प्रकरणी पोलिसांनी एका 19 वर्षीय तरुणाला अटक केली असून 5 अल्पवयीन मुलांना ताब्यात घेतले आहे.
मिळालेल्या माहितीनुसार, ही घटना 8 नोव्हेंबर रोजी रात्री साडेदहा वाजण्याच्या सुमारास विश्रांतवाडी येथील भीमनगर परिसरात घडली. जखमी मुलगा हा मुंजाबा वस्ती येथे राहणारा असून त्याचे काही तरुणांसोबत पूर्वीपासून वाद होते. याच जुन्या भांडणाचा राग मनात धरून संशयितांनी त्याच्यावर हल्ला केल्याचे समोर आले आहे.
‘तू माझ्याबद्दल अफवा का पसरवतोस?’ असा जाब विचारल्यावरून संबंधित तरुणांमध्ये आधी वाद झाला होता. याच वादाचे रूपांतर पुढे हिंसक हल्ल्यात झाले. आरोपींनी 17 वर्षीय मुलाला गाठून त्याच्यावर कोयत्याने वार केले. या हल्ल्यात त्याला गंभीर दुखापत झाली. घटनेनंतर परिसरात एकच खळबळ उडाली. जखमी मुलाला तातडीने उपचारांसाठी ससून रुग्णालयात दाखल करण्यात आले.
या प्रकरणी पीडित मुलाने दिलेल्या तक्रारीवरून विश्रांतवाडी पोलिसांनी सुरज मार्शल चौरु (वय 19, रा. भीमनगर, विश्रांतवाडी) याला अटक केली आहे. तसेच या घटनेत सहभागी असल्याच्या संशयावरून 5 अल्पवयीन मुलांना पोलिसांनी ताब्यात घेतले आहे. या प्रकरणाचा पुढील तपास विश्रांतवाडी पोलीस करत आहेत.
