पुणे : महात्मा जोतिराव फुले यांच्या स्मारकाच्या विस्तारीकरणाचे काम लवकरच सुरू होण्याची शक्यता आहे. या महत्त्वाच्या प्रकल्पासाठी पुणे महापालिकेने प्राथमिक तयारी पूर्ण केली आहे. जागेचे सर्वेक्षण, मालमत्ताधारकांची माहिती आणि आवश्यक कागदपत्रांची पडताळणी करण्यात आली आहे. आता भूसंपादन आणि पुनर्वसनाची प्रक्रिया सुरू करण्याचे नियोजन प्रशासनाने केले आहे.
या प्रकल्पासाठी राज्य सरकारने 300 कोटी रुपयांचा निधी मंजूर केला आहे. त्यापैकी 100 कोटी रुपये महापालिकेला मिळाले असून उर्वरित निधी मिळवण्याची प्रक्रिया सुरू आहे. त्यामुळे अनेक वर्षांपासून रखडलेल्या स्मारकाच्या विस्ताराला आता गती मिळण्याची अपेक्षा आहे.
स्मारकाच्या विकासासाठी एकूण 5,608 चौरस मीटर जागेचे संपादन केले जाणार आहे. यामध्ये 5,310 चौरस मीटर खासगी जागा आणि 298 चौरस मीटर रस्त्याच्या जागेचा समावेश आहे. या परिसरातील 101 सीटीएस क्रमांकांमधील 592 जागामालक आणि 326 भाडेकरूंचे पुनर्वसन केले जाणार आहे.
पुनर्वसनासाठी महापालिकेने वेगवेगळे पर्याय निश्चित केले आहेत. जागामालकांना रेडीरेकनरच्या दराच्या चौपट रक्कम मोबदला म्हणून दिली जाणार आहे. तसेच, या रकमेनुसार उपलब्ध सदनिका घेण्याचाही पर्याय असेल. दुसरीकडे, जुन्या भाडेकरूंना उपलब्ध सदनिका भाड्याने घेता येतील किंवा 15 लाख रुपये रोख मोबदला स्वीकारता येईल. या प्रस्तावाला महापालिकेच्या सर्वसाधारण सभेने 25 ऑगस्ट रोजी मान्यता दिली आहे.
महापालिकेचे उपायुक्त अविनाश सपकाळ यांनी दिलेल्या माहितीनुसार, सर्वेक्षण आणि कागदपत्रांची प्रक्रिया पूर्ण झाली आहे. आता भूसंपादन आणि पुनर्वसनावर भर दिला जाणार आहे. हा प्रकल्प पूर्ण झाल्यानंतर पुण्याच्या सामाजिक आणि ऐतिहासिक वारशात महत्त्वाची भर पडणार आहे.
