देहूगाव: भामा आसखेड जलवाहिनी प्रकल्पाचे काम पूर्ण होऊनही इंद्रायणी नदीपात्रात टाकण्यात आलेला बांधकामाचा राडारोडा अद्याप हटवण्यात आलेला नाही. यामुळे नदीच्या नैसर्गिक प्रवाहाला अडथळा निर्माण होण्याची शक्यता असून, स्थानिक नागरिक आणि शेतकऱ्यांमध्ये नाराजी वाढत आहे. संबंधित ठेकेदाराला नोटीस देऊनही कोणतीही ठोस कारवाई झालेली नसल्याने देहू नगरपंचायतीच्या भूमिकेवर प्रश्न उपस्थित केले जात आहेत.
देहू नगरपंचायत हद्दीतील साई चौक ते वडाचा माळ या परिसरातील पुलाजवळ जलवाहिनी टाकण्याचे काम करण्यात आले होते. हे काम पूर्ण झाल्यानंतर नदीपात्रात साचलेले दगड, माती आणि बांधकामाचे अवशेष काढणे आवश्यक होते. मात्र, ठेकेदाराने अद्याप हा राडारोडा हटवलेला नाही. ठेकेदाराने 15 दिवसांत साफसफाई करण्याचे आश्वासन दिले होते. तरीही परिस्थितीत बदल झालेला नाही.
यापूर्वी नगरपंचायतीने संबंधित ठेकेदाराला नदीपात्र स्वच्छ करून पूर्ववत करण्याची नोटीस बजावली होती. मात्र, त्यानंतरही काम झाले नाही. ऑक्टोबर महिन्याच्या अखेरीस नदीतील पाणी कमी झाल्यानंतर राडारोडा उघडपणे दिसून आला. याबाबत 30 ऑक्टोबर रोजी वृत्त प्रसिद्ध झाल्यानंतर दुसऱ्याच दिवशी धरणातून नदीत पाणी सोडण्यात आले. त्यामुळे नदीपात्रातील राडारोडा पाण्याखाली गेला.
स्थानिकांच्या म्हणण्यानुसार, नदीतील बांधकामाचे अवशेष पाण्याचा प्रवाह बदलू शकतात. त्यामुळे पावसाळ्यात किंवा नदीत पाणी सोडल्यानंतर येलवाडी परिसरातील शेतांमध्ये पाणी शिरण्याची भीती व्यक्त केली जात आहे. याचा फटका शेतकऱ्यांना बसू शकतो.
नगरपंचायतीने नोटीस देऊनही कारवाई न झाल्याने ठेकेदाराला अभय दिले जात आहे का, असा सवाल नागरिक करत आहेत. आता प्रशासन संबंधित ठेकेदारावर दंडात्मक कारवाई करणार का आणि नदीपात्रातील राडारोडा कधी हटवणार, याकडे देहूकरांचे लक्ष लागले आहे.
