पुणे : पुण्यातील हडपसर परिसरातील साडेसतरानळी येथील महानगरपालिकेच्या शाळेतील 400 हून अधिक विद्यार्थ्यांवर आलेले मोठे संकट अखेर टळले आहे. शाळेच्या आवारात असलेल्या मधमाश्यांच्या मोठ्या पोळ्यामुळे विद्यार्थ्यांच्या जिवाला धोका निर्माण झाला होता. मात्र, क्रांती शेतकरी संघाच्या तत्परतेमुळे आणि प्रशासनाच्या वेगावान हालचालींमुळे हे पोळे सुरक्षितपणे हटवण्यात आले आहे.
या शाळेमध्ये पहिली ते सातवी वर्गात शेकडो गरीब कुटुंबातील लहान मुले शिक्षण घेतात. शाळेच्या परिसरात मधमाश्यांचे पोळे असल्याने सतत मधमाश्या घोंघावत होत्या. यामुळे पालकांमध्ये आणि शिक्षकांमध्ये चिंतेचे वातावरण होते. ही गंभीर बाब लक्षात घेऊन क्रांती शेतकरी संघाचे अमोल नाना तुपे यांनी तातडीने पुढाकार घेतला. त्यांनी या समस्येबाबत हडपसर प्रभाग समितीचे अध्यक्ष प्रशांत मामा तुपे आणि हडपसर-मांजरी क्षेत्रीय कार्यालयाचे सहाय्यक आयुक्त कुणाल धुमाळ यांच्याकडे लिखित निवेदन सादर केले.
निवेदन मिळताच प्रशासनाने कोणतीही दिरंगाई न करता तत्परता दाखवली. प्रभाग समिती अध्यक्ष प्रशांत मामा तुपे, सहाय्यक आयुक्त कुणाल धुमाळ आणि नगरसेवक मारुती आबा तुपे यांनी स्वतः शाळेला भेट देऊन प्रत्यक्ष पाहणी केली. परिस्थितीचे गांभीर्य पाहून त्यांनी संबंधित यंत्रणेला जागेवरच मधमाश्यांचे पोळे त्वरित हटवण्याचे कडक निर्देश दिले.
स्थानिक प्रशासनाच्या आदेशानंतर लगेचच पावले उचलत हे धोकादायक पोळे सुरक्षितपणे काढून टाकण्यात आले. या घटनेमुळे मोठा अनर्थ टळला असून शिक्षक, पालक आणि विद्यार्थ्यांनी सुटकेचा श्वास सोडला आहे. विद्यार्थ्यांच्या सुरक्षेसाठी तातडीने पाठपुरावा करून मदत केल्याबद्दल पालकवर्गाकडून अमोल नाना तुपे आणि स्थानिक प्रशासनाचे विशेष आभार मानले जात आहेत.
