CM Eknath Shinde : मुंबई : एकनाथ शिंदे यांनी मुख्यमंत्रीपदाची शपथ घेतल्यानंतर ‘राज्यातला शेतकरी आत्महत्यामुक्त करू’अशी ग्वाही दिली होती. मात्र, विद्यमान सरकारच्या १५ महिन्यांच्या कार्यकाळात ( १ जुलै २०२२ ते ३० ऑक्टोबर २०२३) राज्यातील तब्बल 3 हजार ७२७ शेतकऱ्यांनी आपले जीवन संपवले आहे. त्यामुळे सत्तेत येताना आश्वासने देतात आणि नंतर सत्ता आल्यावर त्याचा विसर पडतो असे काहीसे चित्र समोर आले आहे. उद्धव ठाकरे यांच्या सरकारच्या ३० महिन्यांच्या काळात सहा हजार ९६९ शेतकऱ्यांनी आत्महत्या केल्याची नोंद मदत व पुनर्वसन विभागाकडे झाली आहे. तर एकनाथ शिंदे यांच्या कार्यकाळातील फक्त १५ महिन्यातच 3 हजार ७२७ शेतकऱ्यांनी आपले जीवन संपवले आहे. त्यामुळे नागरिकांमध्ये नाराजी असल्याचे दिसते.
शेतमालाला हमीभाव देखील नाही. दुसरीकडे राज्यातील शेतकरी अतिवृष्टी तर कधी अवकाळी आणि कधी दुष्काळ, अशा संकटांमुळे पिचला आहे. खासगी सावकारांच्या कर्जाचा बोजा आणि सातबाऱ्यावर बॅंकेचा बोजा, त्यातच मुलीचा विवाह, मुलांचे शिक्षण, कुटुंबाचा उदरनिर्वाह भागवताना त्याला तारेवरची कसरत करावी लागते. या पार्श्वभूमीवर सरकारकडून पुरेशा प्रमाणात मदत मिळत नाही आणि हतबल बळीराजा शेवटी वेगवेगळ्या पद्धतीने जगाचा निरोप घेतो ही वस्तुस्थिती आहे.
दरम्यान, मुख्यमंत्री उद्धव ठाकरे यांच्या विषयी बोलायचं झालं तर २८ नोव्हेंबर २०१९ रोजी उद्धव ठाकरे यांनी राज्याच्या मुखयमंत्रीपदाची सूत्रे हाती घेतली. त्यानंतर ३० जून २०२२ पर्यंत त्यांनी राज्याचा कारभार पाहिला. महाविकास आघाडी सत्तेत असताना ३० महिन्यांत (१ डिसेंबर २०१९ ते ३० जून २०२२) या काळात जवळपास सात हजार आणि विद्यमान सरकारच्या १५ महिन्यांच्या काळात जवळपास पावणेचार हजार शेतकऱ्यांनी जगाचा निरोप घेतला आहे.
कुठल्या विभागात शेतकऱ्यांच्या आत्महत्या
पुणे – ९१, नाशिक – १,३७५, छ. संभाजीनगर – ३,६४४, अमरावती – ४,४३६, नागपूर – १,२०२, एकूण १०,७४८
