Uttar Pradesh : उत्तर प्रदेशच्या गाझियाबादमध्ये चहा बनवण्यासाठी उशीर झाला म्हणून नवऱ्याने बायकोची हत्या केल्याची धक्कादायक घटना समोर आली आहे. मंगळवारी सकाळी चहावरुन पती धरमवीर आणि पत्नी सुंदरी यांच्यात किरकोळ वाद झाला होता. या रागातून पती धरमवीरने पत्नीवर तलवारीने वार करत तिची हत्या केल्याचा प्रकार उघडकीस आला आहे. या प्रकरणी आरोपी पतीला पोलिसांनी अटक केली आहे.
पोलिसांनी दिलेल्या माहितीनुसार, रोजंदारीवर काम करणारा धरमवीर नेहमीप्रमाणे मंगळवारी सळाळी कामाला निघाला होता. त्यांने पत्नीकडे चहाची मागणी केली. त्यानुसार सुंदरी देखील स्वयंपाकघरात चहा बनवू लागली. पाच मिनिटांनंतर धरमवीरनं पुन्हा सुंदरीकडे चहा मागितला. तेव्हा चहा तयार व्हायला अजून 10 मिनिटे लागतील असं सुंदरीने धरमवीरला सांगितलं. हे ऐकून धरमीवर संतापला आणि पत्नीशी वाद घालू लागला.
याच वादातून धर्मवीर तलवार घेऊन आला आणि पत्नी सुंदरीवर सपासप वार केले. सुंदरीचा ओरडण्याचा आवाज ऐकून झोपलेली त्यांची मुलं जागी झाली. मुलांनी आईला वाचवण्याचा प्रयत्न केला, त्यावेळी धरमवीरने त्यांनाही जखमी केल्याची धक्कादायक माहिती आहे. त्यामुळे मुलं घाबरुन पुन्हा खोलीत गेले. त्यानंतर जखमी सुंदरी रक्ताच्या थारोळ्यात खाली कोसळली आणि काही वेळातच तिचा दुर्दैवी मृत्यू झाला. पोलिसांनी आरोपी धरमवीरला अटक केली असून महिलेच्या कुटुंबीयांच्या तक्रारीच्या आधारे, त्याच्याविरुद्ध आयपीसीच्या कलम ३०२ अंतर्गत गुन्हा दाखल केला आहे.
