पश्चिम बंगाल : पश्चिम बंगालच्या दक्षिण 24 परगणा जिल्ह्यातील सुंदरबन प्रदेशात एका समलिंगी विवाहमळे सामाजिक वर्तुळात मोठी चर्चा निर्माण झाली आहे. 19 वर्षीय रिया सरदार आणि 20 वर्षीय राखी नास्कर या दोन नृत्यांगना असलेल्या तरुणींनी सामाजिक बंधने झुगारून एकमेकांसोबत आयुष्य घालवण्याचा निर्णय घेतला आणि एका मंदिरात विवाह केला आहे.
रिया (सुंदरबनची रहिवासी) आणि राखी (कुलताली, बकुलतला येथील) यांची दोन वर्षांपूर्वी एका मंदिरात भेट झाली होती. मैत्रीचे रूपांतर हळूहळू प्रेमात झाले. समाजात समलिंगी संबंधांना विरोध असला तरी, त्यांनी एकत्र येण्याचा धाडसी निर्णय घेतला.
कुटुंबीयांकडून संमिश्र प्रतिक्रिया
या विवाहाला रियाच्या कुटुंबाने पूर्ण पाठिंबा दिला आहे, ज्यामुळे हे लग्न शक्य झाले. मात्र, राखीच्या कुटुंबाने सुरुवातीला या संबंधाला विरोध दर्शवला होता. परंतु, या दोघींनी मित्रांच्या मदतीने अखेर मंदिरात लग्नगाठ बांधली. त्यांच्या या अनोख्या लग्नाला गावकऱ्यांनी उपस्थिती लावली.
रिया सरदार म्हणाली, “मला राखी आवडते, म्हणूनच आम्ही लग्न केले आहे. मी आयुष्यभर तिच्यासोबत राहीन.” तर राखी नास्कर म्हणली, “आम्ही दोन वर्षांपासून रिलेशनशिपमध्ये आहोत आणि एकत्र राहण्याचा निर्णय घेतला. सुरुवातीला माझ्या कुटुंबाने रियाला स्वीकारले नव्हते, पण रियाच्या कुटुंबाने मला स्वीकारले, ही समाधानाची गोष्ट आहे.”
समलिंगी विवाहाला कायदेशीर मान्यता मिळण्याच्या चर्चा देशात सुरू असताना, सुंदरबनमधील या तरुणींनी प्रेमासाठी सामाजिक रूढींना दिलेले आव्हान विशेष लक्षवेधी ठरले आहे.
