Tamilnadu Crime: कायद्याचे रक्षण करणाऱ्या दोन नराधमांनीच एका १९ वर्षीय तरुणीवर अत्याचार केल्याची धक्कादायक घटना समोर आली आहे. धक्कादायक बाब म्हणजे या नराधमांनी पीडितेच्या मोठ्या बहिणीसमोर हे कृत्य केलं आहे. ही घटना समोर आल्यानंतर अनेकांनी यावर संताप व्यक्त करत नराधमांना कठोर शिक्षा करण्याची मागणी केली आहे.
नेमकी घटना काय?
पीडित तरुणी तिच्या मोठ्या बहिणीसोबत आंध्र प्रदेशातून तिरुवन्नामलाई येथे ट्रकमधून प्रवास करत होती. सोमवारी मध्यरात्री एंडल बायपास रोडजवळ पोलीस हवालदार सुंदर आणि सुरेश राज तिथं वाहनांची तपासणी करत होते. यावेळी त्यांनी महिला प्रवास करत असलेला ट्रक अडवला आणि नंतर तरुणीला एका निर्जन स्थळी नेत तिच्यावर बलात्कार केला. अत्याचारानंतर पोलिसांनी मंगळवारी पहाटे चार वाजण्याच्या सुमारास दोन्ही बहिणींना रस्त्याच्या कडेला सोडून दिले. जवळच विटभट्टीवर काम करणाऱ्या मजुरांनी त्यांना पाहिले आणि तत्काळ रुग्णवाहिका बोलावून रुग्णालयात दाखल केले.
हेही वाचा: प्रांजल खेवलकर प्रकरणात सर्वात मोठा ट्विस्ट; फॉरेन्सिक रिपोर्टमधून ‘ही’ माहिती आली समोर…
रुग्णालयात पीडितेने जबाब दिल्यानंतर तिच्या तक्रारीवरून दोन्ही आरोपी पोलीस हवालदारांविरुद्ध गुन्हा दाखल करण्यात आला. यानंतर पोलिसांनी तातडीने सुंदर आणि सुरेश राज यांना अटक करत त्यांच्यावर निलंबनाची कारवाई करण्यात आली.
दरम्यान, या प्रकरणाची सखोल चौकशी सुरू असून पुढील कारवाई केली जात असल्याची माहिती पोलिसांनी दिली आहे.
