पुणे : मराठा आरक्षणाच्या मागणीसाठी मनोज जरांगे पाटील यांच्या उपोषणाचा 14 वा दिवस उजाडला असून, हा लढा आता एका महत्त्वाच्या टप्प्यावर पोहोचला आहे. जरांगे पाटील मुंबईमध्ये उपोषण करण्याची शक्यता वर्तवली जात असून, पुढील रणनीती ठरवण्यासाठी त्यांनी अंतरवाली सराटी येथे मराठा बांधवांची बैठक बोलावली आहे. दरम्यान, सलग दोन आठवड्यांच्या उपोषणामुळे त्यांची प्रकृती खालवली आहे.
याच पार्श्वभूमीवर, ‘सिटीझन्स फॉर जस्टिस अँड पीस’ (CJP) चे अभिजीत दीपके यांनी मनोज जरांगे यांची भेट घेऊन त्यांना पाठिंबा दर्शवला. मात्र, या भेटीवर ओबीसी नेते लक्ष्मण हाके यांनी अत्यंत तीव्र शब्दांत आक्षेप घेतला आहे. दीपके यांच्या भूमिकेवर निशाणा साधताना हाके म्हणाले की, दीपके हे नुकतेच अमेरिकेतून आलेले अनुभवी कार्यकर्ते आहेत. त्यांना महाराष्ट्रातील जातीय वास्तव आणि सामाजिक परिस्थितीची कोणतीही सखोल जाणीव नाही. त्यांनी आधी दलित चळवळ आणि स्थानिक परिस्थितीचा नीट अभ्यास केला पाहिजे.
लक्ष्मण हाके यांनी अभिजीत दीपके यांच्यावर टीका करताना पुढील महत्त्वाचे मुद्दे मांडले:
सोनम वांगचुक यांच्याशी तुलना अयोग्य: पद्मश्री विजेते आणि शिक्षणतज्ज्ञ सोनम वांगचुक हे देशाचे प्रेरणास्थान आहेत. त्यांची तुलना शिवराळ भाषा वापरणाऱ्या मनोज जरांगे यांच्याशी करणे चुकीचे आहे.
जात वर्चस्वाला विरोध: मनोज जरांगे पाटील यांना पाठिंबा देणे म्हणजे थेट जात वर्चस्ववादाला खतपाणी घालण्यासारखे आहे.
ओबीसी समाजाला कमी लेखू नये: अभिजीत दीपके यांनी केवळ प्रसिद्धीसाठी अशा प्रकारची पावले उचलू नयेत. ओबीसी शक्तीला हलक्यात घेण्याची चूक त्यांनी करू नये.सामाजिक न्यायाची योग्य समज नसताना दीपके यांनी मराठा आरक्षणाच्या मुद्द्यात हस्तक्षेप करू नये. जर ते वारंवार हीच भूमिका घेत राहतील, तर त्यांनाही तीव्र विरोधाला सामोरे जावे लागेल.
शिक्षणातील सुधारणा आणि भ्रष्टाचाराविरोधातील आंदोलनांना आमचा नेहमीच पाठिंबा राहील; परंतु झुंडशाहीची भाषा करणाऱ्यांच्या पाठीशी उभे राहणे चुकीचे आहे, असा स्पष्ट इशारा हाके यांनी दिला आहे.
