दौंड, ता. 11 : वैद्यकीय उपचारांच्या नावाखाली विमा कंपनीकडे बनावट वैद्यकीय अहवाल, डॉक्टरांचा नोंदणी क्रमांक आणि संशयास्पद कागदपत्रे सादर करून आर्थिक फसवणूक केल्याचा धक्कादायक प्रकार दौंडमध्ये समोर आला आहे. याप्रकरणी बजाज जनरल इन्शुरन्स कंपनीच्या वतीने दौंड पोलिस ठाण्यात तक्रार दाखल करण्यात आली असून, जीवनरेखा मल्टिस्पेशालिटी हॉस्पिटलशी संबंधित तिघांविरोधात भारतीय न्याय संहितेच्या विविध कलमांनुसार गुन्हा दाखल करण्यात आला आहे.
या प्रकरणी अभिजित शशिकांत मोरे (वय 42, शाखा व्यवस्थापक, बजाज जनरल इन्शुरन्स) यांनी पोलिसांत तक्रार दिली आहे. त्यानुसार डॉ. विशाल गोविंद मिसाळ, माधुरी विशाल मिसाळ आणि संकेत राजू होले यांच्याविरोधात गुन्हा दाखल करण्यात आली आहे. पोलिसांनी दिलेल्या माहितीनुसार, संकेत होले यांनी जीवनरेखा मल्टिस्पेशालिटी हॉस्पिटल, दौंड येथे 13 ते 19 जुलै 2024 या कालावधीत उपचार घेतल्याचा दावा करत वैद्यकीय खर्चाच्या प्रतिपूर्तीसाठी विमा कंपनीकडे दावा दाखल केला होता.
या दाव्याच्या पडताळणीदरम्यान विमा कंपनीला संशयास्पद बाबी आढळल्याने सखोल तपास करण्यात आला. विमा दाव्यासोबत डॉ. माधुरी बहिरवाडे यांच्या नावाचा पॅथॉलॉजी अहवाल सादर करण्यात आला होता. या अहवालावर डॉक्टरांचा शिक्का व स्वाक्षरी असल्याचे नमूद करण्यात आले होते. मात्र, त्यावरील वैद्यकीय नोंदणी क्रमांकाची अधिकृत संकेतस्थळावर पडताळणी केली असता सदर नोंदणी क्रमांक डॉ. माधुरी बहिरवाडे यांच्या नावावर नसल्याचे समोर आल्याचा दावा तक्रारीत करण्यात आला आहे.
इतकेच नव्हे तर संबंधित प्रमाणपत्रावरील क्यूआर कोड स्कॅन केल्यानंतर त्यावर अमोल झिपारे या दुसऱ्याच व्यक्तीच्या नावाची नोंदणी आढळल्याचे तक्रारीत नमूद आहे.विमा दाव्यासोबत सादर करण्यात आलेल्या आधारकार्डाचीही पडताळणी करण्यात आली. त्यामध्ये नाव आणि जन्मतारखेबाबत वेगळी माहिती आढळून आली, तर अधिकृत नोंदणीच्या तपासणीत डॉ. माधुरी विशाल मिसाळ यांचे नाव आणि वेगळी जन्मतारीख आढळल्याचा दावा विमा कंपनीने केला आहे.या सर्व बाबींवरून बनावट कागदपत्रे, दुसऱ्या डॉक्टरच्या नोंदणी क्रमांकाचा कथित गैरवापर आणि खोटी ओळख दाखवून विमा कंपनीची आर्थिक फसवणूक करण्याचा प्रयत्न झाल्याचा आरोप तक्रारीत करण्यात आला आहे.
डॉ. विशाल मिसाळ, माधुरी मिसाळ आणि विमाधारक संकेत होले यांनी संगनमत करून असत्य व संशयास्पद वैद्यकीय अहवाल, ओळखपत्रे आणि शिक्क्यांचा वापर केल्याचा आरोप विमा कंपनीने केला आहे. या कागदपत्रांच्या आधारे विमा कंपनीकडून आर्थिक लाभ मिळवण्याचा प्रयत्न केल्याचेही तक्रारीत नमूद आहे. विमा कंपनीने संशय आल्याने संबंधित दावा रद्द केला असून, या संपूर्ण प्रकरणाची कायदेशीर चौकशी करण्यासाठी पोलिसांत तक्रार दाखल करण्यात आली आहे. या प्रकरणी भारतीय न्याय संहितेच्या कलम भारतीय न्याय संहिता कलम 318(3), 318(4), 316(2), 336(3), 319(2), 340(2), आणि 61 अन्वये कारवाई करण्यात आली असून, पुढील तपास पोलिस हवालदार अमीर शेख करीत आहेत.
