पुणे : पुण्यात गणेशोत्सवाच्या काळात गणपती मूर्ती खरेदी आणि प्राणप्रतिष्ठेदरम्यान होणारी गर्दी लक्षात घेता, वाहतूक पोलिसांनी 12,13 आणि 14 सप्टेंबर 2026 या तीन दिवशी शहरात मोठे वाहतूक बदल लागू केले आहेत. सकाळी 6 ते रात्री 12 या वेळेत आवश्यकतेनुसार काही मार्ग बंद ठेवण्यात येतील, तर काही ठिकाणी पार्किंगवर निर्बंध असतील.
गणेशोत्सवाच्या काळात करण्यात आलेले वाहतूक बदल आणि पर्यायी मार्ग–
शिवाजी रोड: गाडगीळ पुतळा चौक ते गोटीराम भैय्या चौक हा रस्ता वाहतुकीसाठी बंद राहील.
पर्यायी मार्ग: गाडगीळ पुतळा चौकातून संताजी घोरपडे पथ, कुंभारवेस चौक आणि शाहीर अमर शेख चौकाचा वापर करता येईल.
शिवाजीनगर ते स्वारगेट: या मार्गावरील वाहनांनी स.गो. बर्वे चौक, जंगली महाराज रोड, खंडोजीबाबा चौक आणि टिळक चौकातून प्रवास करावा.
इतर मार्ग: झाशी राणी चौक ते खुडे चौक जाणारी वाहने डेंगळे पुलावरून कुंभारवेसकडे जातील. तसेच मंगला टॉकीज गल्लीतून येणारी वाहने प्रीमियर गॅरेज चौक आणि शिवाजीपुल चौकातून पुढे जाऊ शकतील.
केशवनगर आणि मुंढवा परिसर:
शिवाजी महाराज चौकातून मांजरीकडे जाणारी वाहने गायरान वस्ती आणि विहान सोसायटी रस्त्याने मांजरीकडे जातील.
खराडी पुलावरून येणारी वाहने रेणुका माता मंदिर आणि विहान सोसायटी मार्गे वळवण्यात आली आहेत.
मुंढवा चौक ते कल्याणी बंगला, शिवाजी चौक ते झेड कॉर्नर आणि केशवनगर भागात अवजड वाहनांना पूर्णपणे बंदी आहे.
सिंहगड रोड: सावरकर पुतळा चौक ते समाधान भेळ सेंटर दरम्यान रस्ता वाहतुकीसाठी सुरू राहील, मात्र या परिसरात वाहने पार्क करण्यास मनाई आहे.
पार्किंग व्यवस्था
गणपती खरेदीसाठी पार्किंग: कामगार पुतळा ते शिवाजी पुतळा (न्या. रानडे पथ), महापालिका बिल भरणा केंद्र ते गाडगीळ पुतळा, टिळक पूल ते भिडे पूल दरम्यानचा नदीपात्रातील रस्ता, मंडईतील मिनर्व्ह व आर्यन पार्किंग, आणि शाहू चौक ते राष्ट्रभूषण चौक (फक्त डाव्या बाजूस).
इतर पार्किंग ठिकाणे: मित्रमंडळ चौक ते पाटील प्लाझा, जमनालाल बजाज पुतळा ते पुरम चौक (डावी बाजू) आणि निलायम ब्रिज ते सिंहगड रोड जंक्शन.
गणेशोत्सव काळात नागरिकांनी या बदलांची नोंद घेऊन सहकार्य करावे, असे आवाहन पुणे वाहतूक पोलिसांनी केले आहे.
