पुणे: पुणे रेल्वे स्थानकाजवळील वॉशिंग यार्डमध्ये उभ्या असलेल्या हाय-स्पीड शताब्दी एक्स्प्रेसच्या एका डब्याच्या चाकाखाली मानवी हात आढळल्याने एकच खळबळ उडाली. गाडीच्या चाकाखाली छिन्नविछिन्न अवस्थेत हा हात दिसून आल्याने रेल्वे प्रशासन आणि कर्मचाऱ्यांमध्येही भीतीचे वातावरण निर्माण झाले. हा हात नेमका कोणाचा आहे आणि तो शताब्दी एक्स्प्रेसच्या चाकाखाली कसा आला, याचा तपास रेल्वे पोलिसांकडून सुरू आहे.
शताब्दी एक्स्प्रेस नेहमीप्रमाणे साफसफाई आणि देखभालीसाठी वॉशिंग यार्डमध्ये उभी करण्यात आली होती. त्यावेळी एका डब्याच्या चाकाखाली हात अडकलेल्या अवस्थेत आढळून आला. घटनेची माहिती मिळताच रेल्वे पोलिसांनी तातडीने घटनास्थळी धाव घेतली. पोलीस उपनिरीक्षक एस. एन. महाजन यांच्या नेतृत्वाखालील पथकाने घटनास्थळाचा पंचनामा करून मानवी हात ताब्यात घेतला. पुढील तपासणी आणि फॉरेन्सिक प्रक्रियेसाठी तो ससून रुग्णालयात पाठवण्यात आला आहे.
या घटनेनंतर हा हात अपघातात रेल्वेखाली आलेल्या व्यक्तीचा आहे का, आत्महत्येचा प्रकार आहे का किंवा यामागे अन्य कोणते कारण आहे, याबाबत विविध शक्यता तपासल्या जात आहेत. मात्र, सध्या कोणताही निष्कर्ष काढण्यात आलेला नाही. रेल्वे पोलिसांकडून सर्व शक्यता लक्षात घेऊन तपास केला जात आहे.
हाताची ओळख पटवणे हे पोलिसांसमोरील प्रमुख आव्हान आहे. त्यासाठी पुणे शहर, पिंपरी-चिंचवड आणि परिसरातील पोलीस ठाण्यांशी संपर्क साधण्यात आला आहे. गेल्या काही दिवसांतील बेपत्ता व्यक्तींच्या तक्रारींची माहितीही पोलिसांकडून गोळा केली जात आहे. फॉरेन्सिक तपासणी आणि इतर पुराव्यांच्या आधारे या हाताची ओळख पटवण्याचा प्रयत्न सुरू आहे. हा हात शताब्दी एक्स्प्रेसच्या चाकाखाली नेमका कसा आला, याचे गूढ उकलण्यासाठी रेल्वे पोलिसांकडून विविध बाजूंनी तपास सुरू आहे.
