पुणे: पुणे जिल्ह्यातील मावळ तालुक्यात अजित पवार यांच्या राष्ट्रवादी काँग्रेसला मोठा धक्का बसला आहे. भाजे ग्रामपंचायतीच्या सरपंचासह सहा सदस्यांना अपात्र ठरवण्यात आले आहे. ग्रामपंचायत कराची थकबाकी विहित मुदतीत न भरल्याच्या प्रकरणात अतिरिक्त विभागीय आयुक्तांनी ही कारवाई केली आहे. या निर्णयामुळे भाजे ग्रामपंचायतीतील राजकीय समीकरण पूर्णपणे बदलले आहे.
भाजे ग्रामपंचायतीत सरपंचासह एकूण दहा सदस्य आहेत. यापैकी सरपंचासह राष्ट्रवादी काँग्रेसचे सात, तर भाजपचे तीन सदस्य होते. मात्र, अपात्रतेच्या आदेशानंतर राष्ट्रवादीचे सरपंच आणि पाच सदस्य पदावरून अपात्र झाले आहेत. त्यामुळे आता भाजपचे तीन आणि राष्ट्रवादी काँग्रेसचा एक सदस्य असे संख्याबळ उरले आहे. ग्रामसेवकांनी अपात्रतेचा आदेश प्राप्त झाल्याची अधिकृत पुष्टी केली आहे.
सरपंच प्रिया अमित ओव्हाळ, उपसरपंच कोमल किरण केदारी, विकास बबन वाल्हेकर, प्रमोद विजय डगळे, सारिका विश्वनाथ पदमुळे आणि कविता अशोक चौरे यांच्यावर ही कारवाई करण्यात आली आहे. ग्रामपंचायत कराची थकबाकी वेळेत न भरल्याचा ठपका त्यांच्यावर ठेवण्यात आला आहे. या प्रकरणी प्रताप कैलास गरवड आणि शेखर चंद्रकांत दळवी यांनी विवाद अर्ज दाखल केला होता. त्यावर सुनावणी झाल्यानंतर अतिरिक्त विभागीय आयुक्तांनी अपात्रतेचा निर्णय दिला.
दरम्यान, अपात्र सदस्यांकडून या कारवाईमागे भाजपचे षडयंत्र असल्याचा आरोप करण्यात आला आहे. मात्र, या आरोपांवर भाजपची भूमिका स्पष्ट झालेली नाही. अपात्र सदस्यांना या आदेशाविरोधात अपील करण्याची संधी आहे. अपील केल्यानंतर स्थगिती मिळाल्यास सुनावणी पूर्ण होईपर्यंत त्यांना पदावर राहता येऊ शकते.
स्थगिती न मिळाल्यास किंवा अपील न केल्यास भाजे ग्रामपंचायतीत सत्तेचे समीकरण काय असेल, याकडे आता सर्वांचे लक्ष लागले आहे. सध्याच्या परिस्थितीत बहुमताचे समीकरण बदलल्याने पुढील प्रशासकीय आणि राजकीय निर्णय महत्त्वाचा ठरणार आहे. आवश्यक असल्यास प्रशासकाची नियुक्ती होऊन त्यानंतर रिक्त जागांसाठी पोटनिवडणूक होऊ शकते. पोटनिवडणुकीत मतदारांचा कौल कोणाला मिळतो, त्यावर भाजे ग्रामपंचायतीची पुढील सत्ता ठरण्याची शक्यता आहे.
