नवी दिल्ली: लोकसभा निवडणुकीची उत्सुकता आणखी वाढली आहे. भाजपपाठोपाठ आता काँग्रेसनेही लोकसभा निवडणुकीसाठी उमेदवारांची पहिली यादी जाहीर केली आहे. त्यात 39 उमेदवारांची नावे आहेत. पक्षाचे ज्येष्ठ नेते शशी थरूर यांना तिरुअनंतपुरममधून उमेदवारी देण्यात आली आहे. येथे भाजपने आधीच केंद्रीय मंत्री राजीव चंद्रशेखर यांना उमेदवारी दिली आहे. अशा स्थितीत तिरुवनंतपुरम जागेसाठीची लढत रंजक बनली आहे.
शुक्रवारी काँग्रेसने लोकसभा निवडणुकीसाठी उमेदवारांची पहिली यादी जाहीर केली. यामध्ये माजी केंद्रीय मंत्री शशी थरूर यांच्या नावाचाही समावेश आहे. थरूर यांना केरळमधील तिरुवनंतपुरममधून पुन्हा एकदा उमेदवारी देण्यात आली आहे. यानंतर थरूर म्हणाले, ‘काँग्रेस पक्षाने मला ही संधी दिली याचा मला सन्मान वाटतो. मला 15 वर्षे तिरुवनंतपुरमची सेवा करण्याचा बहुमान मिळाला आहे आणि आणखी एका संधीची वाट पाहत आहे… मी निष्पक्ष स्पर्धेची वाट पाहत आहे.’ यापूर्वी 2 मार्च रोजी भाजपच्या पहिल्या यादीत 195 नावे जाहीर करण्यात आली होती. त्यात 34 केंद्रीय आणि राज्य मंत्र्यांची नावे होती. पहिल्या यादीत केंद्रीय मंत्री राजीव चंद्रशेखर यांना तिरुवनंतपुरममधून तिकीट देण्यात आले आहे.
तिरुवनंतपुरममधील 2019 चा निकाल कसा लागला?
2019 मध्ये माजी परराष्ट्र व्यवहार राज्यमंत्री शशी थरूर यांनी काँग्रेसच्या तिकिटावर ही जागा जिंकली होती. या निवडणुकीत त्यांना 4,16,131 मते मिळाली. थरूर यांना एकूण 41.15% लोकांची मते मिळाली. गेल्या वेळी भाजप या जागेवर दुसऱ्या क्रमांकावर होता. पक्षाचे उमेदवार कुम्मनम राजशेखरन यांना 3,16,142 म्हणजेच 31.26% मते मिळाली. अशाप्रकारे 2019 च्या लोकसभा निवडणुकीत काँग्रेस नेते शशी थरूर यांनी 99,989 मतांनी विजय मिळवला.
राजीव चंद्रशेखर बद्दल
राजीव हे कौशल्य विकास आणि उद्योजकता मंत्रालय, इलेक्ट्रॉनिक्स आणि माहिती तंत्रज्ञान मंत्रालय आणि जलशक्ती मंत्रालयाचे राज्यमंत्री आहेत. ते भाजपचे राज्यसभा खासदार, उद्योजक आणि टेक्नोक्रॅट आहेत. राजीव हे एप्रिल 2006 ते एप्रिल 2018 पर्यंत कर्नाटकमधून राज्यसभेचे सदस्य होते. एप्रिल 2018 मध्ये ते भाजपचे सदस्य म्हणून तिसऱ्या सहा वर्षांच्या कालावधीसाठी कर्नाटकमधून राज्यसभेवर पुन्हा निवडून आले
शशी थरूर यांच्याबद्दल
शशी थरूर हे सध्या तिरुवनंतपुरम मतदारसंघाचे प्रतिनिधित्व करत आहेत. ते तिसऱ्यांदा लोकसभेचे खासदार आहेत. त्यांनी यापूर्वी केंद्र सरकारमध्ये मनुष्यबळ विकास राज्यमंत्री आणि परराष्ट्र व्यवहार राज्यमंत्री म्हणून काम पाहिले आहे. थरूर यांची संयुक्त राष्ट्रात जवळपास तीन दशकांची कारकीर्द होती. कोफी अन्नान यांच्या नेतृत्वात त्यांनी अंडर-सेक्रेटरी-जनरल म्हणून काम केले.
