Mahadev App Scam Case : महादेव ॲप घोटाळा प्रकरणी एक मोठी अपडेट समोर येत आहे. या प्रकरणातील मुख्य आरोपी सौरभ चंद्राकर याला दुबईतून अटक करण्यात आलं आहे. दुबई पोलिसांनी सौरभ चंद्राकरवर पाळत ठेवली असून त्याला दुबईतील एका घरात नजरकैदेत ठेवण्यात आलं आहे. सौरभ चंद्राकरच्या प्रत्यार्पणाची प्रक्रिया लवकरच सुरू होणार असून ईडीच्या विनंतीवरून इंटरपोलने मुख्य आरोपी सौरभविरुद्ध रेड कॉर्नर नोटीस जारी केली आहे.
महादेव अॅप ऑपरेट करणारे सौरभ चंद्राकर आणि रवी उप्पल पाकिस्तानमध्ये डी-कंपनीला सपोर्ट करत असल्याचा धक्कादायक खुलासा ईडीने केला आहे. तसेच डी कंपनीच्या सांगण्यावरून सौरभ चंद्राकरने अॅप ऑपरेट करण्यासाठी दाऊद इब्राहिमचा भाऊ मुस्तकीम इब्राहिम कासकर याच्यासोबत भागीदारी करून हे अॅप तयार केल्याचेही तपासात उघड झाले आहे.
महादेव बुकसह २२ बेटिंग अॅप्स, वेबसाइट्सवर कारवाई
भारत सरकारने महादेव बुकसह २२ बेकायदेशीर बेटिंग अॅप्स आणि वेबसाइट्सवर मोठी कारवाई केली होती. सरकारने हे सर्व अॅप्स आणि वेबसाइट्स ब्लॉक केल्या होत्या. ईडीने केलेल्या विनंतीनंतर केंद्र सरकारने ही कारवाई केली आहे. तपासात ईडीने या अॅप्सचे ऑपरेशन बेकायदेशीर घोषित केले होते.
काही महिन्यांतच देशभरातील १२ लाखांहून अधिक लोक महादेव अॅपमध्ये सामील झाले होते. याद्वारे लोक क्रिकेटपासून निवडणुकीपर्यंत प्रत्येक गोष्टीवर सट्टा लावण्यासाठी या अॅपचा वापर करू लागले. या घोटाळ्यात बॉलिवूडच्या बड्या सेलिब्रिटींचीही नावे समोर आली असून अनेकांना समन्स पाठवण्यात आले होते. तर काही लोकांची चौकशीही करण्यात आली होती.
