कर्नाटक: कर्नाटकातून हृदय पिळवटून टाकणारी घटना समोर आली आहे. बायकोच्या फसवणूकीमुळे मानसिकदृष्ट्या खचलेल्या एका व्यक्तीने आपल्या पोटच्या चार वर्षांच्या लेकीचा गळा दाबून खून केल्याची घटना उघडकीस आली आहे. त्यानंतर त्यानेही आपल्या आयुष्याचा शेवट केला आहे.
नेमकं काय घडलं ?
मिळालेल्या माहितीनुसार, हि धक्कादायक घटना कर्नाटकातील कोलार जिल्ह्यातल्या मुलबागल तालुक्यात घडली आहे. मृत व्यक्तीचं नाव लोकेश (वय 37 वर्ष) असं आहे, त्याने आपली मुलगी निहारिका (वय 4 वर्ष) हिचा गळा दाबून खून केला आणि नंतर झाडाला फास घेत स्वतःही जीवन यात्रा संपवली.
मी तुझ्यासोबत राहू शकत…
अधिक माहिती अशी की, लोकेशची बायको काही दिवसांपूर्वी एका दुसऱ्या व्यक्तीबरोबर घर सोडून पळून गेली होती. तिने घर सोडून जाताना एक चिठ्ठी लिहिली होती. त्यात ती म्हणाली “मी तुझ्यासोबत राहू शकत नाही. मला घटस्फोट पाहिजे, मला शोधू नकोस.”ही चिठ्ठी लोकेशने वाचल्यानंतर त्याला धक्काच बसला. तो मानसिकदृष्ट्या खचला. त्याच्यावर याचा तीव्र परिणाम झाला. त्यानंतर लोकेशने पत्नी हरवलेली असल्याची तक्रार पोलीस ठाण्यात दिली. त्यानंतर त्याने मुलीला सोबत घेतलं आणि जवळच्या बेकरीत घेऊन गेला. तिथे मुलीच्या आवडीची वस्तू खायला दिली. त्यानंतर काही तासांनंतर तिथेच त्याने आधी पोटच्या मुलीचा गळा दाबून खून केला आणि मग झाडाला फास लावून स्वतःही आत्महत्या केली.
दुसऱ्या दिवशी सकाळी स्थानिक लोकांना रस्त्याच्या कडेला एक उभी केलेली कार दिसली. कारमध्ये मुलीचा मृतदेह होता आणि काही अंतरावरच एका झाडाला लोकेशचा मृतदेह झाडाला लटकलेला दिसून आला.
सदर घटना पोलिसांना कळताच, पोलिस तात्काळ घटनास्थळी पोहोचले, दोन्ही मृतदेह ताब्यात घेऊन शवविच्छेदनासाठी पाठवले. लोकेशला त्याची बायको नव्याश्री आणि तिच्या प्रियकराने मानसिक त्रास दिला आणि त्याला आत्महत्येस प्रवृत्त केल्याच त्याच्या वडिलांनी दिलेल्या फिर्यादीत म्हटलं आहे. .
या प्रकरणी पोलिसांनी IPC कलम 108 (आत्महत्येस प्रवृत्त करणे) खाली गुन्हा नोंदवला आहे. या घटनेनंतर संपूर्ण गावात हळहळ व्यक्त केली जात आहे.
