पुणे : मित्रांसोबत निवांतपणे पत्ते खेळत बसलेल्या तरुणाला पोलिसांच्या कारवाईने चांगलाच धक्का बसला. पोलिसांची चाहूल लागताच जीवाच्या भीतीने पळालेला हा तरुण चक्क भारतीय हवाई दलाच्या प्रतिबंधित क्षेत्रात जाऊन पोहोचला. त्यानंतर हवाई दलाच्या कर्मचाऱ्यांनी आणि पोलिसांनी त्याला ताब्यात घेतले. या प्रकारामुळे लोहगाव परिसरात काही काळ खळबळ उडाली.
ही घटना ३० ऑगस्ट रोजी दुपारी सुमारे तीन वाजण्याच्या सुमारास लोहगावमधील खुलेवस्ती परिसरात घडली. अनिल राम राठोड (३८) हा आपल्या काही मित्रांसोबत पत्ते खेळत बसला होता. पत्त्यांचा डाव रंगात आलेला असतानाच अचानक परिसरात पोलिस आल्याची माहिती मिळाली. ‘पोलीस आले, पळा’ अशी आरोळी होताच पत्ते खेळणाऱ्या तरुणांमध्ये एकच गोंधळ उडाला.
पोलिसांच्या कारवाईपासून वाचण्यासाठी उपस्थित असलेले सर्वजण वेगवेगळ्या दिशेने पळू लागले. अनिल राठोडनेही तेथून पळ काढला. मात्र, पळताना त्याने घेतलेला मार्ग त्याच्यासाठी अडचणीचा ठरला.
समोर असलेली भिंत ओलांडून पुढे जाता येईल, असा विचार करून अनिलने कोणताही विचार न करता भिंतीवरून उडी मारली. मात्र, भिंतीच्या पलीकडे गेल्यानंतर आपण भारतीय हवाई दलाच्या संवेदनशील आणि प्रतिबंधित क्षेत्रात शिरल्याचे त्याच्या लक्षात आले.
या परिसरात अनधिकृत व्यक्ती आल्याचे लक्षात येताच हवाई दलाचे कर्मचारी आणि पोलिसांनी तातडीने कारवाई करत अनिलला पकडले. चौकशीदरम्यान पोलिसांच्या भीतीने पळत असताना चुकून भिंत ओलांडल्याचे त्याने सांगितल्याची माहिती आहे.
या प्रकरणी हवाई दलाचे कर्मचारी हितेश प्रेमजीभाई डाभी (४४) यांच्या तक्रारीवरून विमानतळ पोलीस ठाण्यात अनधिकृत प्रवेश केल्याप्रकरणी गुन्हा दाखल करण्यात आला आहे. पोलिसांनी अनिल राठोडला अटक केली असून पुढील तपास सुरू आहे.
