नंदुरबार : महाराष्ट्र लोकसेवा आयोगाच्या अन्न व औषध प्रशासन विभागातील औषध निरीक्षक पदाच्या परीक्षा पेपरफुटी प्रकरणात महत्त्वाची माहिती समोर आली आहे. या प्रकरणातील मुख्य संशयित ऋतुजा पाटील यांना मुंबई पोलिसांच्या विशेष गुन्हे शाखेने नंदुरबार येथील ज्ञानदीप सोसायटीतील त्यांच्या राहत्या घरातून ताब्यात घेतले आहे. सकाळपासून नंदुरबारमध्ये ठाण मांडून बसलेल्या पोलिसांच्या पथकाने विविध ठिकाणी तपास केल्यानंतर ही कारवाई केली. त्यांना पुढील चौकशीसाठी मुंबईला नेले जात आहे.
या प्रकरणात आधी केवळ ‘प्रेमप्रकरण’ आणि कौटुंबिक वादाचा अँगल पुढे करून मूळ मुद्दा दाबण्याचा प्रयत्न सुरू असल्याचा गंभीर आरोप तक्रारदार ऋषिकेश गांगुर्डे यांनी केला आहे. गांगुर्डे यांच्या मते, ज्या गौरव पाटील यांनी या घोटाळ्याविरोधात त्यांच्यासोबत आवाज उठवला आणि वरिष्ठ अधिकारी तुकाराम मुंढे यांच्याकडे तक्रार केली, त्यांनाच पोलिसांनी अटक केली आहे. हा प्रकार म्हणजे खऱ्या गुन्हेगारांना सोडून तक्रारदारालाच लक्ष्य करण्यासारखा आहे.
तक्रारदाराच्या दाव्यानुसार, हा पेपर एका अधिकाऱ्याने आपल्या नातेवाईकासाठी बाहेर काढला होता. त्यानंतर 50 लाख रुपयांना विकत घेतलेला हा पेपर पुढे प्रत्येकी 10 लाख रुपयांना विकून रॅकेट चालवण्यात आले. त्यामुळे ही पेपरफुटी सातारा, बीड आणि सोलापूर यांसारख्या जिल्ह्यांमध्ये मोठ्या प्रमाणावर पसरली.
दरम्यान, मुंबई गुन्हे शाखेने या प्रकरणात धडक कारवाई करत एमपीएससीच्या तीन वरिष्ठ अधिकाऱ्यांसह आतापर्यंत सहा जणांना बेड्या ठोकल्या आहेत. यामध्ये आयोगाचे अप्पर सचिव अभिजीत लेंडवे यांचाही समावेश आहे. या संपूर्ण गैरप्रकारामुळे औषध निरीक्षक, गट-ब या पदासाठी घेतलेली संपूर्ण भरती प्रक्रिया रद्द करण्यात आली आहे. ऋतुजा पाटील यांच्या अटकेमुळे आता या आंतरजिल्हा रॅकेटचा पर्दाफाश होण्यास मोठी मदत होणार आहे.
