मुंबई : मुंबईतून एक मोठी आगीची बातमी समोर आली आहे. शहरातल्या गोवंडी-शिवाजी नगर आणि आदर्श नगर परिसरातील झोपडपट्टीला शनिवारी १७ फेब्रुवारी ला पहाटे साडेतीन वाजण्याच्या सुमारास अचानक आग लागली. सुदैवाने या घटनेत जीवितहानी झालेली नाही. मात्र, या आगीत अनेक झोपडपट्या जळून खाक झाल्या आहेत. बघता-बघता आगीने रौद्ररुप धारण केलं. काही क्षणातच आगीने संपूर्ण झोपडपट्टीला विळखा घातला.
या घटनेची माहिती मिळताच अग्निशमन दलाचे ६ बंब घटनास्थळी दाखल झाले. अथक प्रयत्नानंतर अग्निशमन दलाच्या जवानांना आग आटोक्यात आणण्यात यश आलं. दरम्यान, सुदैवाने या घटनेत कोणतीही जीवितहानी झाली नाही. मात्र, अनेक झोपड्या जळून खाक झाल्या आहे. त्यामुळे स्थानिक नागरिकांचं मोठं नुकसान झालं आहे. संसार उपयोगी वस्तू डोळ्यादेखत जळून खाक झाल्याने अनेकांना अश्रू अनावर झाले होते.
नेमकं काय घडलं?
गोवंडी-शिवाजी नगर आणि आदर्श नगर हा झोपडपट्टी परिसर असून या भागात नागरिकांची मोठी वर्दळ असते. शनिवारी पहाटे साडेतीन वाजण्याच्या सुमारास काही झोपड्यांना अचानक आग लागली. आग लागल्याचं कळताच परिसरातील नागरिकांनी आरडाओरड सुरू केली. अनेकांनी आग विझवण्याचा प्रयत्न केला.
मात्र, क्षणार्धात आगीचा भडका उडल्याने संपूर्ण झोपडपट्टीला आगीने विळखा घातला. त्यामुळे नागरिकांनी जीव वाचवण्यासाठी मोकळ्या जागेत धाव घेतली. आगीची माहिती मिळताच अग्निशमन दलाच्या जवानांसह पोलिसांनी घटनास्थळी धाव घेतली. अथक प्रयत्नानंतर अग्निशमन दलाच्या जवानांनी आग आटोक्यात आणली. त्यामुळे मोठा अनर्थ टळला. आगीचे कारण अद्याप समजू शकलेलं नाही.
