नवी मुंबई: परदेशातून आलेल्या तरुणीला हातवारे करून तिच्यासोबत ओळख वाढवण्याचा प्रयत्न करणाऱ्या व्यक्तीला तरुणीच्या मित्राने रोखल्याने संतप्त झालेल्या या व्यक्तीने त्याच्या डोक्यावर बीयरची बाटली फोडून तसेच लाथाबुक्क्यांनी बेदम मारहाण केल्याची घटना गुरुवारी रात्री सीबीडीतील द बार स्टॉक एक्स्चेंज बारमध्ये घडली. सीबीडी पोलिसांनी याप्रकरणी हल्ला करणाऱ्या अनिकेत भोसले (रा. सीवूड्स) व त्याच्या साथीदारांविरोधात गुन्हा नोंद करून त्यांचा शोध सुरू केला आहे.
राज्योत्तम गांगुली (४३) हे सीबीडी, सेक्टर-३० परिसरात राहतात. ३१ ऑक्टोबर रोजी रात्री राज्योतम हे रशिया येथून आलेल्या त्यांच्या मैत्रिणीला घेऊन या बारमध्ये जेवण्यासाठी गेले होते. यावेळी या बारमध्ये दुसऱ्या टेबलवर अनिकेत भोसले व त्याचे मित्र बसले होते. दरम्यान, राज्योत्तमच्या मैत्रिणीला पाहून अनिकेत हाय हॅलो बोलत हातवारे करू लागला. त्यावर राज्योत्तमने अनिकेतला याचा जाब विचारत तसे न करण्याबाबत बजावले. त्यामुळे संतापलेल्या अनिकेतने राज्योत्तमला डोक्यावर बीयरची बाटली मारून जखमी केले.
त्यानंतर त्याच्या मित्रांनी राज्योत्तमला लाथाबुक्क्यांनी मारहाण करून तेथून पलायन केले. या हल्ल्यात जखमी झालेल्या राज्योत्तमने रुग्णालयात उपचार घेऊन सीबीडी पोलीस ठाण्यात तक्रार दाखल केली. त्यानुसार पोलिसांनी अनिकेत भोसले व त्याच्या साथीदाराविरोधात गुन्हा दाखल करून त्यांचा शोध सरू केला आहे.
