ठाणे : ठाणे जिल्ह्यात एक धक्कादायक प्रकार समोर आला आहे. अंबरनाथ शहरात पाण्याची मोटार चोरल्याच्या संशयावरून काही स्थानिकांनी दोघांना बेदम मारहाण केल्याची घटना घडली आहे. एका पोलीस अधिकाऱ्याने शनिवारी ही माहिती दिली आहे. तपासादरम्यान दोघांना ताब्यात घेण्यात आल्याचे वरिष्ठ पोलीस निरीक्षक अशोक भगत यांनी सांगितले.
अशोक भगत यांनी दिलेल्या माहितीवरून, शुक्रवारी सकाळी रस्त्याने जाणाऱ्यांनी अंबरनाथच्या दुर्गादेवी पाड्यात सुरज परमार आणि सूरज कोरी यांचे मृतदेह पडल्याची माहिती पोलिसांना दिली. घटनास्थळावरील सीसीटीव्ही फुटेजमध्ये दोघेही पाण्याची मोटर चोरून पळून जाताना दिसत आहेत आणि कुत्रे त्यांच्यावर भुंकत आहेत. या आवाजामुळे काही नागरिकनागरिक जागे झाले. यानंतर जमावाने दोघांचा पाठलाग करून त्यांना बेदम मारहाण केली.
या मारहाणीमध्ये त्यांचा मृत्यू झाला. दोघांचा मृतदेह पोस्टमार्टमसाठी पाठवण्यात आला. अंतर्गत जखमांमुळे रक्तस्त्राव होऊन दोघांचाही मृत्यू झाल्याचे पोस्टमॉर्टम अहवालात समोर आलं. या घटनेनी एकच खळबळ उडाली आहे. याप्रकरणी अंबरनाथ शिवाजीनगर पोलिसांनी 20 संशयिताना ताब्यात घेतलं असून चौकशीनंतर दोन जणांना बेड्या ठोकल्या आहेत.
नेमकं प्रकरण काय ?
सूरज परमार आणि सूरज उर्फ भेय्या निर्मल कोरी असं मयत दोघांची नावं आहेत. दुर्गादेवी पाडा परिसरात साई कृपा कॉलनी येथे हे दोन्ही मृतदेह नागरिकांना आढळून आले, या घटनेची माहिती तात्काळ शिवाजी नगर पोलिसांना देण्यात आली. पोलिसांनी घटनास्थळी धाव घेत पंचनामा करून मृतदेह शवविच्छेदनासाठी रुग्णालयात पाठविले. चोरीचा संशयातून या दोघांना मारहाण केली, त्या मारहाणीत मृत्यू झाला. मयत दोघेही तरुण प्रकाश नगर आणि शिवमंदिर परिसरातील राहणारे आहेत.
