उरुळी कांचन, (पुणे) : जिल्हा परिषदेच्या शाळा म्हटलं की, (Uruli Kanchan News )डोळ्यासमोर फक्त स्थानिक भाषा येते, पण हवेली तालुक्यातील पेठ येथील जिल्हा परिषद प्राथमिक शाळेने हा समज मोडीत काढला आहे. या शाळेतील चिमुकल्या विद्यार्थ्यांनी थेट राज्याचे मुख्यमंत्री देवेंद्र फडणवीस यांच्याशी अस्खलित फ्रेंच भाषेत संवाद साधला. ग्रामीण भागातील मुलांचा हा आत्मविश्वास आणि परकीय भाषेवरील प्रभुत्व पाहून मुख्यमंत्र्यांनीही आश्चर्य व्यक्त करत विद्यार्थ्यांचे भरभरून कौतुक केले.
या यशाचे खरे शिल्पकार ठरले आहेत ते म्हणजे शाळेचे मार्गदर्शक शिक्षक सचिन साकोळकर सर. परकीय भाषा शिकणे अवघड मानले जात असताना, साकोळकर सरांनी आपल्या कल्पक अध्यापन पद्धतीतून ग्रामीण भागातील मुलांमध्ये फ्रेंच भाषेची गोडी निर्माण केली. त्यांच्या सातत्यपूर्ण परिश्रमामुळेच आज ही मुले जागतिक स्तरावरील भाषेमध्ये संवाद साधण्यास सक्षम झाली आहेत.
शिक्षकांच्या अशा धाडसी प्रयोगांमागे जिल्हा परिषदेच्या वरिष्ठ अधिकाऱ्यांचे भक्कम सहकार्य लाभले आहे. यामध्ये प्रामुख्याने जिल्हा परिषदेचे मुख्य कार्यकारी अधिकारी गजानन पाटील, प्राथमिक शिक्षणाधिकारी संजय नाईकडे, हवेलीचे गटविकास अधिकारी शेखर शेलार, गटशिक्षणाधिकारी हेमंतकुमार खाडे या सर्व अधिकाऱ्यांनी दिलेल्या पाठिंब्यामुळेच पेठ शाळेतील शैक्षणिक दर्जा आज ‘ग्लोबल’ झाला आहे.
दरम्यान, मराठी मातीत वाढलेली मुले जेव्हा परकीय भाषेत मुख्यमंत्र्यांशी सहजपणे बोलू लागली, तेव्हा उपस्थित सर्वच भारावून गेले होते. मुख्यमंत्र्यांनी दिलेली शाबासकीची थाप ही केवळ पेठ शाळेसाठी नाही, तर संपूर्ण जिल्हा परिषदेच्या शिक्षण व्यवस्थेसाठी गौरवास्पद ठरली आहे. सध्या सोशल मीडियासह सर्वत्र सचिन साकोळकर सर आणि त्यांच्या या हुशार विद्यार्थ्यांवर कौतुकाचा वर्षाव होत आहे.
