यवत, (पुणे) : किराणा दुकानात आईस्क्रीम उधार न दिल्याच्या कारणावरून दुकानदारावर आणि त्यांच्या मुलावर जीवघेणा हल्ला केल्याची घटना घडली आहे. या घटनेत आरोपींनी चक्क दुकानदाराच्या गालाचा आणि मुलाच्या हाताचा चावा घेतल्याने परिसरात खळबळ उडाली आहे. याप्रकरणी यवत पोलिसांनी दोन जणांविरुद्ध गुन्हा दाखल केला आहे. हि घटना शनिवारी (ता. 18) रात्री सात वाजण्याच्या सुमारास वरवंड (ता. दौंड) हद्दीतील गोपीनाथ नगर येथे घडली
याप्रकरणी बाळासाहेब विनायक शितोळे, (वय 64, व्यवसाय – किराणा दुकान, रा. गोपीनाथ नगर वरवंड ता. दौड जि.पुणे) यांनी यवत पोलीस ठाण्यात फिर्याद दिली आहे. त्यानुसार पोलिसांनी शुभम गणेश खेडकर व गणेश रघूनाथ विटेकर (दोन्ही रा. वरखंड ता. दौंड) यांच्यावर विविध कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी बाळासाहेब शितोळे यांचे गोपीनाथ नगर येथे किराणा दुकान आहे. शनिवारी (ता. 18) रात्री सात वाजण्याच्या सुमारास बाळासाहेब हे आपल्या दुकानात बसलेले असताना, शेजारी राहणारे आरोपी शुभम खेडकर आणि गणेश विटेकर तिथे आले. त्यांनी बाळासाहेब यांच्याकडे आईस्क्रीमची मागणी केली आणि ते उधार देण्यास सांगितले.
बाळासाहेब यांनी आईस्क्रीम उधार देण्यास स्पष्ट नकार दिला. याचा राग मनात धरून आरोपी शुभम खेडकर याने अश्लील शिवीगाळ करत आपल्या हातातील कड्याने बाळासाहेब यांच्या डाव्या डोळ्याच्या खाली जोरात प्रहार केला. इतक्यावरच न थांबता, दुसरा आरोपी गणेश विटेकर याने बाळासाहेब यांच्या उजव्या गालाचा जोरात चावा घेतला.
वडिलांना मारहाण होत असल्याचे पाहून त्यांचा मुलगा भालचंद्र हा तिथे भांडण सोडवण्यासाठी धावून आला. यावेळी आरोपी गणेश याने भालचंद्र याच्या उजव्या हाताच्या दंडावर आणि डाव्या कानावरही जोरात चावा घेऊन त्याला जखमी केले. जाता जाता आरोपींनी “तुम्हाला जिवंत सोडणार नाही” अशी धमकी देऊन दुकानाचा बोर्ड तोडून नुकसान केले आणि तिथून पळ काढला.
दरम्यान, या प्रकरणी बाळासाहेब शितोळे यांनी दिलेल्या तक्रारीवरून वरील दोघांवर विविध कलमान्वये गुन्हा दाखल करण्यात आला आहे.
