उरुळी कांचन, (पुणे) : “शिवीगाळ का केली?” असे किरकोळ कारणावरून विचारण्यासाठी गेलेल्या तरुणावर आणि त्याच्या भावावर चाकूने हल्ला केल्याची घटना घडली आहे. उरुळी कांचन (ता. हवेली) ग्रामपंचायत हद्दीतील गोळेवस्ती परिसरात रविवारी (ता. 19) सायंकाळी सहा वाजण्याच्या सुमारास हि घटना घडली आहे. याप्रकरणी पती-पत्नी विरोधात उरुळी कांचन पोलीस ठाण्यात गुन्हा दाखल करण्यात आला आहे.
अमोल लक्ष्मण झोंबाडे (वय 39, व्यवसाय-ड्रायव्हर, जात हिंदु- मातंग, रा. गोळे वस्ती उरूळी कांचन ता. हवेली) असे हल्ला झालेल्या व्यक्तीचे नाव आहे. तर विकास सायसराव मोहिते व हेमा विकास मोहिते असे गुन्हा दाखल करण्यात आलेल्या दोघांची नावे आहेत. यातील विकास मोहिते याच्यावर लोणी काळभोर पोलीस ठाण्यात मारहाण, तोडफोड आणि धमकावल्याप्रकरणी (३२३, ३२४, ५०४, ५०६, ४२७) गुन्हा दाखल आहे.
पोलिसांनी दिलेल्या माहितीनुसार, रविवारी सायंकाळी सहा वाजण्याच्या सुमारास फिर्यादी अमोल झोंबाडे घराबाहेर गेले असताना, त्यांच्या पत्नीने फोन करून सांगितले की शेजारी राहणारा विकास मोहिते हा विनाकारण शिवीगाळ करत आहे. अमोल तातडीने घरी आले आणि “तुम्ही आम्हाला शिवीगाळ का केली?” अशी विचारणा करण्यासाठी विकास मोहिते याच्या घरासमोर गेले.
अमोल यांनी जाब विचारताच आरोपी विकास मोहिते आणि त्याची पत्नी हेमा मोहिते यांनी पुन्हा शिवीगाळ सुरू केली. यावेळी विकास याने घरातून चाकू आणून अमोल यांच्या कपाळावर वार करून त्यांना जखमी केले. तसेच पत्नी हेमा हिने अमोल यांना हाताने मारहाण करून जीवे मारण्याची धमकी दिली.
दरम्यान, यावेळी अमोल यांचा मावस भाऊ मिथुन रंगनाथ वाघमारे हा भांडण सोडवण्यासाठी मध्यस्थी करायला आला असता, आरोपी विकास याने त्याच्यावरही चाकूने वार केला. यामध्ये मिथुन याच्या डाव्या हाताच्या करंगळीला गंभीर दुखापत झाली आहे. आरोपी विकास मोहिते हा पोलीस रेकॉर्डवरील गुन्हेगार असल्याचे समोर आले आहे. त्याच्यावर लोणी काळभोर पोलीस ठाण्यात मारहाण, तोडफोड आणि धमकावल्याप्रकरणी गुन्हा दाखल आहे. पुढील तपास तपास पोलीस हवालदार प्रविण गोसावी करीत आहेत.
