पुणे: पुण्यात पोलीस उपनिरीक्षक असल्याची खोटी बतावणी करणाऱ्या एका महिलेला लष्कर पोलिसांनी अटक केली आहे. खाकी गणवेश परिधान करून ती एका खासगी रुग्णालयात गेली होती. वैद्यकीय तज्ज्ञांची भेट लवकर मिळावी यासाठी तिने स्वतःला पोलीस अधिकारी असल्याचे भासवल्याचे तपासात समोर आले आहे.
या प्रकरणी समिना आफिस इनामदार उर्फ समिना आयुब पठाण (वय 25, रा. म्हाळुंगे) हिच्याविरुद्ध गुन्हा दाखल करण्यात आला असून तिला अटक करण्यात आली आहे. याबाबत सहायक पोलीस फौजदार महेश शिंदे यांनी लष्कर पोलीस ठाण्यात तक्रार दिली आहे.
पोलिसांच्या माहितीनुसार, 6 जून रोजी सकाळी सुमारे 10 वाजता आरोपी महिला व्हिक्टरी चित्रपटगृहासमोरील एका खासगी रुग्णालयात आली होती. त्याच वेळी सहायक फौजदार महेश शिंदे हेही तपासणीसाठी तेथे उपस्थित होते. महिलेने शिंदे यांच्याशी संवाद साधत त्यांची नियुक्ती कोणत्या पोलीस ठाण्यात आहे, अशी विचारणा केली. तसेच तिला डॉक्टरांची भेट लवकर मिळण्यासाठी मदत करण्याची विनंती केली.
दरम्यान, शिंदे यांचे लक्ष महिलेच्या गणवेशावरील नेमप्लेटकडे गेले. ती नेमप्लेट पोलीस गणवेशावर लावण्याच्या नियमांप्रमाणे नसल्याचे त्यांच्या निदर्शनास आले. त्यामुळे त्यांना संशय आला. चौकशी केल्यानंतर महिलेने आपण बाणेर पोलीस ठाण्यात कार्यरत असून रात्रपाळीनंतर थेट रुग्णालयात आल्याचे सांगितले.
मात्र, तिच्या उत्तरांबाबत शंका निर्माण झाल्याने शिंदे यांनी लष्कर पोलीस ठाण्यातील महिला कर्मचाऱ्यांना माहिती दिली. त्यानंतर करण्यात आलेल्या चौकशीत ती प्रत्यक्षात पोलीस दलात कार्यरत नसल्याचे उघड झाले. खोट्या ओळखीच्या आधारे पोलीस अधिकारी असल्याचे भासवून तिने फसवणुकीचा प्रयत्न केल्याचे समोर आले. या प्रकरणी गुन्हा दाखल करण्यात आला असून पोलीस उपनिरीक्षक यादव पुढील तपास करत आहेत.
