पुणे : लग्नाच्या वेळी सुख-दुःखात साथ देण्याची दिलेली शपथ एका पत्नीने प्रत्यक्ष कृतीतून सिद्ध केली आहे. जुन्नर तालुक्यातील वडगाव आनंद येथील अर्चना वाळुंज यांनी आपल्या पतीचे प्राण वाचवण्यासाठी स्वतःची किडनी दान केली. दोन्ही किडन्या निकामी झाल्यानंतर गंभीर परिस्थितीत असलेल्या किशोर गहिनाजी वाळुंज यांच्यावर पुण्यातील इनलॅक्स बुधावणी रुग्णालयात किडनी प्रत्यारोपणाची यशस्वी शस्त्रक्रिया करण्यात आली.
किशोर वाळुंज यांना किडनीच्या आजाराचे निदान झाल्यानंतर त्यांच्यावर मंचर येथील सार्थक रुग्णालयात नेफ्रॉलॉजिस्ट डॉ. प्रितम गाडे यांच्या मार्गदर्शनाखाली उपचार सुरू होते. मागील 6 महिन्यांपासून त्यांना नियमित डायलिसिस घ्यावे लागत होते. उपचारादरम्यान डायलिसिससाठी तयार करण्यात आलेले फिस्टुला निकामी झाल्याने त्यांची प्रकृती अधिक बिघडली होती.
तपासण्यांमध्ये दोन्ही किडन्या पूर्णपणे निकामी झाल्याचे समोर आले. त्यामुळे किडनी प्रत्यारोपण करण्याचा सल्ला डॉक्टरांनी दिला. मात्र, योग्य दाता मिळणे हे कुटुंबासमोर मोठे आव्हान होते. पतीची अवस्था पाहून अर्चना वाळुंज यांनी स्वतःची किडनी दान करण्याचा निर्णय घेतला. आवश्यक वैद्यकीय तपासण्या पूर्ण झाल्यानंतर प्रत्यारोपणाची प्रक्रिया पार पडली. शस्त्रक्रियेनंतर किशोर आणि अर्चना वाळुंज दोघांचीही प्रकृती स्थिर असल्याची माहिती देण्यात आली आहे. पत्नीच्या कृतीचे सर्वत्र कौतुक होत आहे.
