पिंपरी-चिंचवड: गणेशोत्सवातील ढोल-ताशा आणि मोठ्या आवाजातील वाद्यांचा मुद्दा यंदा पुन्हा चर्चेत आला आहे. पिंपरी-चिंचवडमधील यशवंतराव चव्हाण स्मृती रुग्णालयाच्या (YCM) परिसरात गणेश विसर्जन मिरवणुकीदरम्यान ढोल-ताशा आणि बँड वाजवल्याचा प्रकार समोर आला आहे. रुग्णालयाचा परिसर शांतता क्षेत्रात येत असल्याने या घटनेची प्रशासनाने गंभीर दखल घेतली आहे.
मिळालेल्या माहितीनुसार, रुग्णालयातील कर्मचारी महासंघासह अधिकारी आणि कर्मचाऱ्यांनी गणेशोत्सवानिमित्त गणेशमूर्तीची प्रतिष्ठापना केली होती. उत्सवाच्या नवव्या दिवशी मूर्तीच्या विसर्जनासाठी मिरवणूक काढण्यात आली. यावेळी रुग्णालयाच्या आवारातच ढोल-ताशा आणि बँड वादन करण्यात आल्याचे सांगण्यात आले.
दरम्यान, प्रकरणाची दखल घेत महापालिका आयुक्त विजय सूर्यवंशी यांनी YCM रुग्णालय प्रशासनाला चौकशी करून संबंधितांवर कारवाई करण्याचे निर्देश दिले. त्यानंतर रुग्णालयाचे अधिष्ठाता डॉ. राजेंद्र वाबळे आणि अतिरिक्त आरोग्य वैद्यकीय अधिकारी डॉ. अभयचंद्र दादेवार यांनी उत्सवाच्या आयोजनाशी संबंधित 13 अधिकारी-कर्मचाऱ्यांना कारणे दाखवा नोटीस बजावली आहे.
नोटिशीमध्ये संबंधितांकडून या प्रकाराबाबत खुलासा मागवण्यात आला आहे. खुलासा मिळाल्यानंतर त्याच्या आधारे पुढील प्रशासकीय कारवाई केली जाणार असल्याची माहिती प्रशासनाकडून देण्यात आली आहे. दरम्यान, पोलिसांनीही या प्रकरणात स्वतंत्र कारवाई केली आहे. दोन महिला डॉक्टर आणि बँडच्या मालकासह एकूण 6 जणांविरोधात गुन्हा दाखल करण्यात आला आहे. संत तुकारामनगर पोलीस ठाण्यात याबाबत तक्रार दाखल करण्यात आली आहे.
रुग्णालय परिसर शांतता क्षेत्रात येत असल्याने रुग्णांना आणि त्यांच्या नातेवाईकांना मोठ्या आवाजाचा त्रास होऊ शकतो, या मुद्द्यावरून ही कारवाई करण्यात आल्याचे पोलिसांच्या तक्रारीत नमूद आहे.
