शिक्रापूर : पुणे जिल्ह्यातील शिक्रापूर परिसरातून एक दुर्दैवी घटना समोर आली आहे. हॉटेलमध्ये काम करत असताना एका 23 वर्षीय तरुणाची अचानक प्रकृती बिघडली. काही वेळातच त्याला रुग्णालयात दाखल करण्यात आले. मात्र, उपचार सुरू असतानाच त्याचा मृत्यू झाला. या घटनेमुळे परिसरात हळहळ व्यक्त होत आहे.
मृत तरुणाचे नाव सुमित रुदिदत्त सेमवाल असे आहे. तो 23 वर्षांचा असून सध्या शिक्रापूरमधील बजरंगवाडी येथे राहत होता. त्याचे मूळ गाव उत्तराखंडमध्ये असल्याची माहिती समोर आली आहे. सुमित शिक्रापूर येथील हॉटेल नंदीमध्ये काम करत होता.
मिळालेल्या माहितीनुसार, 24 तारखेच्या सुमारास सुमित नेहमीप्रमाणे हॉटेलमध्ये काम करत होता. काम सुरू असतानाच त्याला अचानक मोठ्या प्रमाणात घाम येऊ लागला. त्याची तब्येत बिघडल्याचे लक्षात येताच सहकाऱ्यांनी तातडीने मदत केली. त्याला पुढील उपचारांसाठी जवळच्या रुग्णालयात नेण्यात आले.
रुग्णालयात दाखल केल्यानंतर डॉक्टरांनी त्याच्यावर उपचार सुरू केले. मात्र, वैद्यकीय पथकाने प्रयत्न करूनही सुमितचा उपचारादरम्यान मृत्यू झाला. अवघ्या 23 वर्षांच्या तरुणाचा अचानक मृत्यू झाल्याने त्याच्या सहकाऱ्यांना आणि हॉटेलमधील इतर कर्मचाऱ्यांना मोठा धक्का बसला आहे.
या घटनेची माहिती मिळाल्यानंतर शिक्रापूर पोलिसांनी प्रकरणाची नोंद केली आहे. पोलिसांकडून अकस्मात मृत्यूची नोंद करण्यात आली असून तरुणाच्या मृत्यूमागील नेमके कारण काय होते, याचा तपास सुरू आहे.
दरम्यान, अचानक प्रकृती खालावून तरुणाचा मृत्यू झाल्याने विविध चर्चा सुरू झाल्या असल्या तरी मृत्यूचे कारण तपास आणि वैद्यकीय अहवालातूनच स्पष्ट होणार आहे.
