पुणे : पुण्यातील कोरेगाव पार्क परिसरात एका तरुणाने गळफास घेऊन आत्महत्या केल्याची घटना समोर आली असून या प्रकरणी पाच जणांविरोधात आत्महत्येस प्रवृत्त केल्याचा गुन्हा दाखल करण्यात आला आहे. मृत तरुणाच्या बहिणीने दिलेल्या तक्रारीनंतर कोरेगाव पार्क पोलिसांनी ही कारवाई केली आहे.
मृत तरुणाचे नाव विशाल भैरम काळे (वय 21, रा. हुडको कॉलनी, शिरूर) असे आहे. याप्रकरणी चैत्राली ऊर्फ चैतू चंदू भोसले, रोहित चंदू भोसले, ऋषिकेश चंदू भोसले, कोला काळूराम काळे आणि परशान काळूराम काळे यांच्याविरोधात गुन्हा नोंदविण्यात आला आहे.
पोलिसांच्या माहितीनुसार, विशाल आणि आरोपी हे परस्पर नातेवाईक आहेत. ते कोरेगाव पार्क सिग्नल परिसरात फुले आणि इतर किरकोळ वस्तू विक्रीचा व्यवसाय करत होते. विशालचे एका तरुणीशी प्रेमसंबंध होते. या संबंधांवरून आरोपींकडून त्याला वारंवार त्रास दिला जात असल्याचा आरोप तक्रारीत करण्यात आला आहे.
तक्रारीनुसार, आरोपींनी विशालकडे पैशांची मागणी केली होती. तसेच त्याला मारहाण करून मानसिक त्रास दिल्याचाही आरोप करण्यात आला आहे. या सततच्या त्रासामुळे विशाल तणावाखाली होता. अखेर 1 जून रोजी रात्री त्याने कोरेगाव पार्क परिसरात झाडाला गळफास घेऊन आत्महत्या केली.
घटनेनंतर मृताच्या बहिणीने पोलिसांकडे तक्रार दाखल केली. तिच्या तक्रारीनुसार आरोपींच्या छळाला कंटाळून विशालने हे टोकाचे पाऊल उचलल्याचा आरोप करण्यात आला आहे. त्यानुसार पोलिसांनी आत्महत्येस प्रवृत्त केल्याप्रकरणी पाच जणांविरोधात गुन्हा दाखल केला आहे.
या प्रकरणाचा पुढील तपास पोलीस उपनिरीक्षक अश्विनी वनवे करत आहेत.
