पुणे : पुणे शहरात पोलीस संरक्षणाबाबत विशेष शाखेकडून एक महत्त्वाचा निर्णय घेण्यात आला आहे. 23ऑक्टोबर रोजी पोलीस उपआयुक्त प्रशांत अमृतकर यांच्या अध्यक्षतेखाली पार पडलेल्या संरक्षण समितीच्या बैठकीत सुरक्षेचा आढावा घेण्यात आला. या बैठकीनंतर 24 ऑक्टोबरला जारी केलेल्या पत्रानुसार, शहरातील 25 हून अधिक प्रसिद्ध आणि व्यावसायिक व्यक्तींचे पोलीस संरक्षण काढून घेण्यात आले आहे.
विशेष शाखेने घेतलेल्या या निर्णयानुसार अनेक उद्योजक, वकील आणि संस्थाप्रमुखांची सुरक्षा मागे घेण्यात आली आहे. यामध्ये सिरम इन्स्टिट्यूटचे सायरस पुनावाला, पुनीत बालन, अजिंक्य डी. वाय. पाटील, मिशेल योहान पुनावाला आणि योहान झवेरी पुनावाला यांचा समावेश आहे. तसेच राजकीय विश्लेषक तेहसीन पुनावाला, चित्रपट निर्माते मिहिर कुलकर्णी, गोसेवा आयोगाचे अध्यक्ष शेखर मुंदडा, सरहद संस्थेचे संजय नहार, कोरेगाव भीमा प्रकरणाचे वकील आशिष सातपुते आणि ध्वनी प्रदूषणाच्या मुद्द्यावरून चर्चेत आलेले विद्यानंद बापट यांच्यासह काही प्रमुख बांधकाम व्यावसायिकांची सुरक्षा काढण्यात आली आहे.
तर काही व्यक्तींचे संरक्षण पूर्वीप्रमाणेच ठेवण्याचा निर्णय झाला आहे. बारामती विमानतळाजवळील हल्ल्यानंतर चर्चेत आलेला आणि सध्या फरार असलेला उद्योगपती राणा सूर्यवंशी याचे ‘वाय प्लस एस्कॉर्ट’ दर्जाचे संरक्षण कायम ठेवण्यात आले आहे. याशिवाय, ओबीसी नेते लक्ष्मण हाके यांना पुरवण्यात आलेली ‘1+1’ सशस्त्र पोलीस आणि एस्कॉर्ट वाहनाची सुरक्षा देखील जैसे थे ठेवण्यात आली आहे.
पुणे पोलीस दलाची विशेष शाखा दर एक ते दोन महिन्यांनी शहरातील कायदा व सुव्यवस्थेचा आणि व्यक्तींना असलेल्या धोक्याचा आढावा घेते. या पाहणीनंतर गरज आणि तीव्रतेनुसार सुरक्षा वाढवणे, कमी करणे किंवा ती काढून घेण्याचा निर्णय घेतला जातो. 25 हून अधिक लोकांचे संरक्षण अचानक रद्द झाल्याने पुणे शहरात या निर्णयाची मोठी चर्चा सुरू आहे.
