दौंड (पुणे) : नानवीज (ता. दौंड) ग्रामपंचायत हद्दीत घर बांधण्यावरून झालेल्या दोन भावंडाच्या गटात लोखंडी गजाने, विटेने मारहाण करून जीवे मारण्याची धमकी दिल्याची घटना घडली आहे. गुरुवारी (ता. 29) दुपारी तीन वाजण्याच्या सुमारास नानवीज (ता. दौंड) ग्रामपंचायत हद्दीत ही घटना घडली आहे. याप्रकरणी दौंड पोलिसांनी 9 जणांविरुद्ध विविध कलमान्वये परस्परविरोधी गुन्हे दाखल केले आहेत. यामध्ये तीन महिलांचा समावेश आहे.
याप्रकरणी विकास मारूती पाटोळे यांनी दिलेल्या तक्रारीनुसार, प्रकाश मारूती पाटोळे, अतुल प्रकाश पाटोळे, प्रफुल प्रकाश पाटोळे, माया उर्फ प्रतीभा प्रकाश पाटोळे, प्रतीक्षा प्रकाश पाटोळे (सर्व रा. नानवीज ता. दौंड) तर प्रतिभा प्रकाश पाटोळे यांनी दिलेल्या तक्रारीनुसार विकास मारुती पाटोळे, विराज विकास पाटोळे (रा. दोघेही नानवीज ता. दौंड), निता खंडेराव शितोळे, व चेतन खंडेराव शितोळे (रा. पडवी ता. दौंड) असे परस्परविरोधी गुन्हे दाखल करण्यात आलेल्यांची नावे आहेत.
पहिल्या घटनेत विकास पाटोळे यांनी दिलेल्या तक्रारीनुसार, विकास पाटोळे व प्रकाश पाटोळे हे सख्खे भाऊ आहेत. गुरुवारी प्रकाश पाटोळे हे कोणाला काही न सांगता घराचे बांधकाम करीत होते. त्यामुळे विकास यांनी आपले वाटण्या झाल्या शिवाय तु काय बांधकाम करू नको ” असे सांगितले. यावेळी प्रकाश पाटोळे, अतुल पाटोळे, प्रफुल पाटोळे, प्रतीभा पाटोळे, प्रतीक्षा पाटोळे आले व त्यांनी शिवागाळ दमदाटी करून हाताने व लाथाबुक्याने मारहाण करण्यास सुरवात केली.
यावेळी बहीण निता शितोळे व मुलगा विराज पाटोळे हे सोडवण्यास आले असता त्यांनाही हाताने व लाथाबुक्याने मारहाण केली.याप्रकरणी विकास पाटोळे यांनी दिलेल्या तक्रारीनुसार वरील पाच जणांवर दौंड पोलीस ठाण्यात भा.न्या संहिता कलम 189(2), 191(2), 118(1),115(2), 351(2), 352, अपंग कायदा कलम 92 (ब) प्रमाणे गुन्हा दाखल करण्यात आला आहे.
दुसऱ्या घटनेत प्रतिभा पाटोळे यांनी दिलेल्या तक्रारीनुसार, प्रतिभा पाटोळे व त्यांचे कुटुंबीय घराचे बांधकाम करीत असताना निता शितोळे, विकास पाटोळे, विराज पाटोळे, चेतन शितोळे हे त्या ठिकाणी आले व तुम्ही इथे बांधकाम करायचे नाही ही जागा आमची आहे असे म्हणुन ननंद निता शितोळे यांनी शिवीगाळ करीत लाथाबुक्याने मारहाण करण्यास सुरुवात केली. चेतन खंडेराव शितोळे याने आम्हाला शिवीगाळ करुन घराचे बांधकाम पाडुन नुकसान केले.
यावेळी मुले अतुल व प्रफुल्ल हे दोघेजण भांडणे सोडविण्यासाठी आले असता विकास व विराज पाटोळे यांनी लोखंडी गजाने अतुल व प्रफुल यांना हातावर, छातीवर, पाठीवर व प्रफुल्ल याचे हातावर, कमरेवर, पाठीवर मारहाण करुन दुखापत केली. तसेच पती प्रकाश पाटोळे यांना हाताने मारहाण करुन इथे बांधकाम करायचे नाही तुम्ही इथे बांधकाम केले तर तुम्हाला जिवे मारुन टाकीन अशी धमकी दिली आहे. प्रतिभा पाटोळे यांनी दिलेल्या तक्रारीनुसार भा.न्याय.संहिता कलम 118(1), 115(2),352, 351(2),324(4),3(5) प्रमाणे गुन्हा दाखल करण्यात आला आहे.
दरम्यान, याप्रकरणी दोघांनी दिलेल्या तक्रारीनुसार दौंड पोलिसांनी 9 जणांविरुद्ध विविध कलमान्वये परस्परविरोधी गुन्हे दाखल केले आहेत. तपास दौंड पोलीस करीत आहेत.
11:10 am
