पुणे: पुण्यातील बिबवेवाडी परिसरात ‘भावेश मोरे हा आमचा भाई आहे, त्याच्याशी तू वाद का घालतोस?’ असे म्हणत एका तरुणावर टोळक्याने हल्ला केल्याची घटना समोर आली आहे. आरोपींनी तरुणाला बेदम मारहाण करून तीक्ष्ण शस्त्राने डोक्यात वार केल्याने तो गंभीर जखमी झाला. या प्रकरणी पोलिसांनी दोघांना अटक केली असून, त्यांच्या अन्य साथीदारांविरुद्ध गुन्हा दाखल करण्यात आला आहे.
साक्षर महेश अडागळे (वय २५, रा. मीनाताई ठाकरे वसाहत, गुलटेकडी) असे जखमी तरुणाचे नाव आहे. त्याच्या फिर्यादीवरून पोलिसांनी अथर्व ऊर्फ साई शिंदे (वय २०) आणि राहुल ख्याडगी (वय १९, रा. शिवतेजनगर, अपर बिबवेवाडी) यांना अटक केली आहे. मोहन जीवन विद्यासागर, केदार ऊर्फ सोन्या क्षीरसागर, ओमकार राहुल अडागळे आणि समर्थ गरड यांच्याविरुद्धही गुन्हा दाखल करण्यात आला आहे.
ही घटना २७ ऑगस्ट रोजी रात्री दीडच्या सुमारास बिबवेवाडीतील समर्थनगर परिसरात घडली. साक्षर अडागळे हा त्याचा मित्र शंतून गायकवाड याच्या घरासमोर रात्री उशिरापर्यंत गप्पा मारत थांबला होता. शंतून घरी गेल्यानंतर साक्षरही गाडी घेऊन घरी जाण्याच्या तयारीत होता. त्याचवेळी साई शिंदे आणि त्याचे साथीदार तेथे आले.
आरोपींनी साक्षरला शिवीगाळ करत भावेश मोरे याच्याशी वाद का घालतोस, असा जाब विचारला. त्यानंतर त्यांनी त्याला मारहाण करण्यास सुरुवात केली. साई शिंदे याने हातातील शस्त्राने साक्षरच्या डोक्यात वार केला. इतर साथीदारांनीही त्याला मारहाण केली.
आरडाओरड ऐकून शंतूनची आई साक्षरला वाचवण्यासाठी मध्ये आली. मात्र आरोपींनी तिलाही शिवीगाळ करून मध्ये पडल्यास सोडणार नाही, अशी धमकी दिल्याचे तक्रारीत नमूद आहे. डोक्यातून मोठ्या प्रमाणात रक्तस्राव झाल्यानंतर साक्षर गाडी तिथेच सोडून जवळ राहणाऱ्या मित्राच्या घरी पळून गेला. त्यानंतर आरोपींचे टोळके तेथून निघून गेले.
साक्षरला उपचारासाठी भारती रुग्णालयात दाखल करण्यात आले. त्याची सीटी स्कॅन तपासणी करण्यात आली असून, डोक्याला गंभीर दुखापत झाल्याचे डॉक्टरांनी सांगितले. या प्रकरणाचा पुढील तपास सहायक पोलीस निरीक्षक शरयू देशमुख करत आहेत.
