थेऊर : बंद गोदामाच्या भिंतीवरून उडी मारून आत प्रवेश करत चोरट्यांनी इलेक्ट्रिक साहित्यावर डल्ला मारल्याची घटना मांजरी खुर्द परिसरात घडली. चोरट्यांनी गोदामातील सीसीटीव्ही कॅमेऱ्यावर कापड टाकून तब्बल1 लाख 10 हजार 793 रुपयांचे कॉपर केबल, आर्थिंग कॉपर प्लेट, कॉपर रोड आणि वायरचे बंडल लंपास केले. या प्रकरणी वाघोली पोलिस ठाण्यात अज्ञात चोरट्यांविरुद्ध तक्रार दाखल करण्यात आली आहे.
मांजरी खुर्द येथील चिंतामणी पार्क परिसरात कविता गजानन जाधव यांच्या नावावर ‘साई पॉवर सोल्युशन’ हे फर्म असून, एमएसईबीशी संबंधित कामासाठी लागणारे विविध इलेक्ट्रिक साहित्य त्यांच्या गोदामात ठेवण्यात येते. हे गोदाम गरजेनुसार तीन-चार दिवसांतून एकदा उघडले जाते.
9 ऑगस्ट रोजी दुपारी साडेदोनच्या सुमारास गोदाम बंद करून कुलूप लावण्यात आले होते. त्यानंतर 14 ऑगस्ट रोजी सकाळी दहा वाजता गोदाम उघडण्यासाठी गेलेल्या गजानन जाधव यांना कुलूप जमिनीवर पडलेले दिसले. आत जाऊन पाहणी केली असता कॉपर केबल, आर्थिंग कॉपर प्लेट, कॉपर रोड आणि वायरचे बंडल गायब असल्याचे त्यांच्या निदर्शनास आले.
साहित्य चोरीला गेल्याचे लक्षात आल्यानंतर गोदामातील सीसीटीव्ही फुटेज तपासण्यात आले. त्यामध्ये 11 ऑगस्ट रोजी पहाटे 2.18 ते 2.54 या कालावधीत दोन अनोळखी इसम भिंतीवरून उडी मारून गोदामाच्या आवारात शिरताना दिसले. त्यानंतर त्यांनी सीसीटीव्ही कॅमेऱ्यावर कापड टाकले आणि गोदामात प्रवेश करून इलेक्ट्रिक साहित्य चोरून नेले. विशेष म्हणजे, गोदामातून बाहेर पडताना चोरट्यांनी कॅमेऱ्यावरील कापड काढून तेही सोबत नेल्याचे सीसीटीव्ही फुटेजमध्ये दिसून आले आहे.
दरम्यान, चोरीला गेलेल्या मालामध्ये 35 हजार रुपयांचे कॉपर केबलचे 10 बंडल, सुमारे 20 हजार रुपयांच्या आर्थिंग कॉपर प्लेट, 25 हजार 794 रुपयांचे आर्थिंग कॉपर रोड आणि सुमारे 30 हजार रुपयांचे विविध आकाराचे कॉपर वायर बंडल असा एकूण 1 लाख 10 हजार 793 रुपयांचा मुद्देमाल असल्याचे तक्रारीत नमूद करण्यात आले आहे. सीसीटीव्ही फुटेजच्या आधारे पोलिसांकडून अज्ञात चोरट्यांचा शोध सुरू असून पुढील तपास सुरु आहे.
