केडगाव, दौंड : गर्भलिंग निदान प्रकरणातील आरोपी अण्णासाहेब आप्पा गिरी (वय ४२, रा. केडगाव, ता. दौंड) याच्याविरोधात बलात्काराच्या आरोपावरून यवत पोलीस ठाण्यात गुन्हा दाखल करण्यात आला आहे. १६ सप्टेंबर २०२६ रोजी मिळालेल्या तक्रारीनंतर पोलिसांनी ही कारवाई केली.
गिरी हा यापूर्वीच्या प्रकरणात न्यायालयीन कोठडीत होता. त्यामुळे नव्या गुन्ह्यात त्याला ताब्यात घेण्यासाठी पोलिसांनी न्यायालयाकडून प्रोडक्शन वॉरंट घेतले. त्यानुसार २४ सप्टेंबर रोजी पोलिसांनी येरवडा मध्यवर्ती कारागृहातून त्याचा ताबा घेतला. त्यानंतर त्याला अटक करून न्यायालयात हजर करण्यात आले.
न्यायालयाने आरोपीला २८ सप्टेंबर २०२६ पर्यंत पोलीस कोठडी सुनावली आहे. या कालावधीत प्रकरणाशी संबंधित अधिक तपास पोलिसांकडून करण्यात येत आहे.
ही कारवाई पुणे ग्रामीण पोलीस अधीक्षक संदीपसिंग गिल, अपर पोलीस अधीक्षक गणेश बिरादार आणि उपविभागीय पोलीस अधिकारी बापूराव दुरस यांच्या मार्गदर्शनाखाली करण्यात आली. पोलीस निरीक्षक संतोष तासगावकर, सहायक पोलीस निरीक्षक नितीन अतकरे, पोलीस हवालदार प्रमोद गायकवाड, सुहास देवकाते, पोलीस कॉन्स्टेबल धैरज जाधव, विनित कुन्हाडे आणि मोहन भानवसे यांच्या पथकाने आरोपीला ताब्यात घेतले.
प्रकरणाचा पुढील तपास यवत पोलिसांकडून सुरू आहे.
