Theur News : लोणी काळभोर, (पुणे) : हवेली तालुक्यातील वारकरी संप्रदायाचा वैभवशाली वारसा जपणारा आणि डोळ्यांचे पारणे फेडणारा ‘वासंतिक चंदनउटी मोगरा आरास वारकरी भजन व संमेलन’ सोहळा शुक्रवारी (ता. 15) श्रीक्षेत्र थेऊर (ता. हवेली) येथे संपन्न होणार आहे. सलग दुसऱ्या वर्षी आयोजित होणाऱ्या या सोहळ्यात हवेली तालुक्यातील 71 गावांतील भजनी मंडळे, कीर्तनकार आणि वारकरी मोठ्या संख्येने सहभागी होणार आहेत. Theur News
थेऊर येथील श्री महातारी माता मंदिर येथे शुक्रवारी (ता. 15) दुपारी 4 ते रात्री 9 वाजेपर्यंत या कार्यक्रमाचे आयोजन करण्यात आले आहे. उन्हाळ्याच्या दिवसात पांडुरंगाला शीतलता मिळावी या श्रद्धेने चंदनउटी आणि मोगऱ्याची आकर्षक आरास केली जाते. या निमित्ताने श्री महातारी माता मंदिर परिसरात भक्तिमय वातावरण निर्माण होणार असून, मोगऱ्याच्या सुगंधात वारकरी भजनाचा आनंद द्विगुणित होणार आहे. Theur News
यावेळी हवेली तालुक्यातील 71 गावांतील 500 हून अधिक टाळकरी एकाच वेळी अभंगवाणी सादर करणार आहेत. तसेच पुरुष आणि महिला भजनी मंडळांचा एकत्रित सहभाग आणि भव्य टाळ गजर असणार आहे. या सोहळ्यासाठी खासदार डॉ. अमोल कोल्हे, आमदार ज्ञानेश्वर माऊली कटके, बापूसाहेब पठारे, माजी आमदार अशोक बापू पवार, यांच्यासह हवेली पंचायत समितीचे सभापती युवराज नाना काकडे यांच्यासह जिल्ह्यातील पदाधिकारी व विविध देवस्थानचे विश्वस्त उपस्थित राहणार आहेत. Theur News
दरम्यान, अखिल भारतीय वारकरी मंडळाचे उपाध्यक्ष ह.भ.प. आनंद महाराज विश्वनाथ तांबे यांनी या ऐतिहासिक सोहळ्यात सहभागी होण्याचे आवाहन केले आहे. “हवेली तालुक्यातील वारकरी संस्कृतीचे दर्शन घडवणारा हा सोहळा असून, सर्व वारकऱ्यांनी आपला टाळ सोबत घेऊन यावे,” अशी विनंती त्यांनी केली आहे. सोहळ्याच्या शेवटी सर्व भाविकांसाठी महाप्रसादाचे आयोजन करण्यात आले आहे. Theur News
