Solapur News : सोलापूर, ता. 25 : माढा तालुक्यातील उपळाई हद्दीतील ‘येडेश्वरी’ ढाब्यावर अवैध मद्यविक्रीवर कारवाई करण्यासाठी गेलेल्या राज्य उत्पादन शुल्क विभागाच्या पथकावर ढाबा मालकाने आपल्या साथीदारांसह भीषण हल्ला केला. “राज्यात सगळीकडे मद्यविक्री सुरू आहे, मग तुम्ही आमच्याच ढाब्यावर कसे येता?” असा सवाल करत ढाबा मालकाने दोन अधिकाऱ्यांना प्लास्टिक पाईपने बेदम मारहाण केली. या हल्ल्यात उपनिरीक्षक अमित नागरे आणि अंमलदार युवराज टिळे हे दोघे गंभीर जखमी झाले आहेत.
सोलापूरच्या राज्य उत्पादन शुल्क विभागाला टोल फ्री क्रमांकावर माहिती मिळाली होती की, माढा तालुक्यातील जगदंबा आणि येडेश्वरी या ढाब्यांवर अवैध मद्यविक्री सुरू आहे. त्यानुसार बुधवारी (ता. २२ एप्रिल) रात्री साडेआठच्या सुमारास उपनिरीक्षक अमित नागरे यांचे पथक कारवाईसाठी तिथे पोहोचले. पथकाने कारवाई सुरू करताच येडेश्वरी ढाब्याचा मालक प्रमोद गोरे पाटील ऊर्फ गोट्या याने पथकासोबत वाद घालण्यास सुरुवात केली.
कारवाई सुरू असताना राज्य उत्पादन शुल्क विभागाचा अंमलदार पुरावा म्हणून मोबाईलमध्ये व्हिडिओ शुटिंग करत होता. हे पाहून चिडलेल्या आरोपीने अंमलदाराचा मोबाईल हिसकावून घेतला आणि तो परत देण्यास नकार दिला. त्यानंतर त्याने गावातील आपल्या काही नातेवाईक आणि मित्रांना बोलावून घेतले आणि पथकाला वेढा घातला.
आरोपी प्रमोद गोरे आणि त्याच्या साथीदारांनी उपनिरीक्षक नागरे आणि टिळे यांना प्लास्टिक पाईपने मारहाण करण्यास सुरुवात केली. “बाकीचे ढाबे दिसत नाहीत का?” असे ओरडत आरोपीने या अधिकाऱ्यांना रक्ताळू केले. या मारहाणीत उपनिरीक्षक नागरे यांच्या डोक्याला गंभीर दुखापत झाली असून त्यांच्यावर रुग्णालयात उपचार सुरू आहेत.
पोलिसांनी दिलेल्या माहितीनुसार, आरोपी प्रमोद गोरे पाटील हा सराईत असून त्याच्याविरुद्ध यापूर्वीही अवैध मद्यविक्रीचे दोन गुन्हे दाखल आहेत. वारंवार कारवाई होऊनही त्याची मुजोरी कमी झाली नसल्याचे या घटनेवरून स्पष्ट होत आहे.
कडक कारवाईचे संकेत
या घटनेनंतर राज्य उत्पादन शुल्क विभागाच्या अधीक्षक भाग्यश्री जाधव यांनी तातडीने दखल घेतली आहे. “शासकीय कामात अडथळा आणणे आणि अधिकाऱ्यांना मारहाण केल्याप्रकरणी माढा पोलीस ठाण्यात गुन्हा दाखल करण्याची प्रक्रिया सुरू आहे. दोषींवर कडक कारवाई केली जाईल,” असे त्यांनी सांगितले.
