हडपसर, ता. 25 : काळेपडळ परिसरात निष्काळजीपणाचा भीषण बळी घेतल्याची धक्कादायक घटना समोर आली आहे. वेल्डिंगचे काम करत असताना एका कामगाराचा उच्च दाब वीजतारेच्या संपर्कात येऊन गंभीर अपघात झाला आणि उपचारादरम्यान त्याचा मृत्यू झाला. या घटनेमुळे परिसरात संतापाची लाट उसळली आहे.
मिळालेल्या माहितीनुसार, रविवारी (ता.19) दुपारी साडेचारच्या सुमारास ही घटना घडली. महादेव रघुनाथराव कल्तिकर (वय 33) हे वेल्डिंगचे काम करत असताना अचानक उच्च दाब तारेच्या संपर्कात आले. या अपघातात ते सुमारे 70 टक्के भाजले होते. त्यांना तातडीने ससून रुग्णालय येथे उपचारासाठी दाखल करण्यात आले; मात्र गुरुवारी (ता.23) उपचारादरम्यान त्यांची प्राणज्योत मालवली.
महादेव कल्तिकर यांच्या पश्चात पत्नी आणि अवघ्या 8 महिन्यांचा मुलगा असा परिवार असून, या घटनेने कुटुंबावर दुःखाचा डोंगर कोसळला आहे. स्थानिक नागरिकांनी या प्रकरणात महावितरण कंपनीच्या निष्काळजीपणावर थेट आरोप करत संताप व्यक्त केला आहे.
विशेष म्हणजे, साई विहार परिसरातील नागरिकांनी 2021 पासूनच या धोकादायक उच्च दाब तार हटवण्याची मागणी केली होती. मात्र, वारंवार पाठपुरावा करूनही कोणतीही ठोस कारवाई करण्यात आली नाही. “जर वेळेत उपाययोजना केली असती, तर आज एका कुटुंबाचा कर्ता वाचला असता,” असा संतप्त सूर नागरिकांनी व्यक्त केला. या घटनेनंतर महावितरणकडून तत्काळ मदत देण्यात यावी, तसेच संबंधित दोषी अधिकारी आणि कर्मचाऱ्यांवर कडक कारवाई करावी, अशी मागणी जोर धरू लागली आहे.
दरम्यान, काळेपडळमधील ही घटना केवळ अपघात नसून, दुर्लक्षाचा परिणाम असल्याचा आरोप होत आहे. प्रशासनाने यापुढे अशा घटना टाळण्यासाठी तातडीने पावले उचलणे गरजेचे आहे, अन्यथा अशा “मृत्यूच्या सापळ्यां”मुळे आणखी किती जीव जाणार? असा सवाल उपस्थित होत आहे.
