चाकण: पुण्यातील चाकण (ता.खेड) परिसरातुन एमडी ड्रग्जची विक्री खुलेआम सुरु असल्याची माहिती समोर आली आहे. येथे हॉटेल ग्रँड समोर एक काळ्या स्कॉर्पिओ गाडीतून एमडी ड्रग्ज घेऊन जात आहे. खबर पक्की आहे. विक्री करणाऱ्याला सोडू नका, मॅनेज होऊ नका. आत्ताच धाड टाकली तर आरोपी जाळ्यात सापडेल अशी खबर मिळताच चाकण पोलिसांनी सापळा रचून स्कॉर्पिओ मालकाला अटक केली आहे.
मात्र, पोलिसांनी शिताफीने तपास करत हा एक कटाचा भाग असल्याचं उघडकीस आणलं. या प्रकरणात धक्कादायक बाब म्हणजे खबर देणाराच कटाचा खरा सूत्रधार निघाला आहे. जमीन व्यवहाराच्या वादातून मित्रांनी मित्रालाच खोट्या गुन्ह्यात अडकविण्यासाठी रचलेल्या कटाचा पर्दाफाश चाकण पोलिसांच्या डीबी पथकाने केला आहे.
अधिक माहिती अशी की, जमिन प्लॉटिंगच्या व्यवहारातून तुषार कड याचे निखिल कड आणि राहुल टोपे (तिघे रा.वाकी,ता.खेड,जि. पुणे ) यांच्यात आर्थिक देवाण – घेवाणीवरून वाद झाले होते. मैत्रीत वितुष्ट आल्यानंतर काहीही करुन तुषारला धडा शिकवायचा, असा निखिल आणि राहुलने ठरवले होते. मात्र आपण कट रचत असल्याची कल्पना तुषारला होऊ नये याची खबरदारी त्या दोघांनी घेतली होती. मग या कटात मित्र हनिफ मुजावरलाही त्यांनी सोबतीला घेतलं. हनिफने पुण्यातील खबरी वसीम शेखच्या कानावर ही बाब टाकून चौघांच्या चर्चेत तुषारला एमडी ड्रग्ज प्रकरणात अडकविण्याचा कट रचला.
ठरल्यानुसार, हनिफकडे 10 लाख रुपये देण्यात आले. हनिफने एमडी ड्रग्ज उपलब्ध केलं. एका सिल्व्हर कागदात आठ छोट्या पिशव्यांमध्ये हे एमडी ड्रग्ज ठेवलं. निखिल कडे तुषारच्या गाडीची चावी असल्यामुळे ड्रग्जची पिशवी ड्रायव्हर सीटच्या पाठीमागे ठेवली. यानंतर वसीमने चाकण पोलिसांना याबाबत खबर दिली.
त्यानंतर पुणे-नाशिक महामार्गावरील चाकण गावच्या हद्दीतील हॉटेल ग्रँड समोर तुषार आणि निखिल व्यवहाराबाबत चर्चा करत असतांना निखिलने लोकेशन पोलिसांचा खबरी वसीमला दिलं. वसीमने ते लोकेशन चाकण पोलिसांना पाठवलं. त्यानंतर तिथं स्कॉर्पिओचा मालक खुलेआम एमडी ड्रग्जची विक्री करतोय, त्याला रंगेहाथ ताब्यात घ्या, मॅनेज होऊ नका. असा मेसेज ही वसीमने दिला. पोलिसांनी तातडीनं सापळा रचत तुषारला अटक केली.
दरम्यान, घटनास्थळी उपस्थित असणाऱ्या निखिलने माझा मित्र असं काही करुच शकत नाही. तुम्ही विनाकारण त्याला ड्रग्ज प्रकरणात ताब्यात घेतलं आहे. असं म्हणत निखिलने तुषारची बाजू घेतली. मात्र गाडीमध्ये एमडी ड्रग्ज गाडीत सापडल्यामुळे चाकण पोलिसांनी तुषारला अटक केली. तपास सुरु असताना तुषारने मला यात अडकवलं जात असल्याचं वेळोवेळी सांगितलं.
त्यानंतर पोलिसांनी त्याचे क्राईम रेकॉर्ड तपासले असता त्याची गुन्हेगारी पार्श्वभूमी नसल्याचं समोर आलं. त्यानंतर चाकण पोलिसांनी तपासाची चक्र फिरवत अतिशय शिताफीने तपास करत या ड्रग्स प्रकरणाचा पर्दाफाश केला. चाकण डीबी पथकाच्या या कामगिरीने खोट्या गुन्ह्याचा फर्दाफास केल्यामुळे तुषार कड या प्रकरणातून निर्दोष मुक्त होणार आहे.
चाकण पोलिसांनी आत्तापर्यंत निखिल कड, राहुल टोपे अन वसीम शेखच्या मुसक्या आळवल्यात आहेत. तर आरोपी हनिफ मुजावरचा शोध सुरु आहे. त्याला अटक केल्यानंतर एमडी ड्रग्ज कुठून उपलब्ध केलं याबाबतची माहिती समोर येईल. तसेच या प्रकरणाशी संबंधित माहिती समोर येण्यास मदत होईल.
