पुणे: पुणे शहर पोलिस दलाच्या 2024-25 भरती प्रक्रियेला (Pune Police Bharati) उमेदवारांचा मोठा प्रतिसाद मिळाला आहे. पोलिस शिपाई, वाहनचालक, बँडसमन आणि (Police Bharati) कारागृह शिपाई या पदांसाठी राबविण्यात येणाऱ्या या भरती प्रक्रियेसाठी तब्बल 2 लाख 19 हजार 927 अर्ज प्राप्त झाले आहेत. पुणे शहर पोलिस दलातील आतापर्यंतची ही सर्वांत मोठी भरती असल्याचे चित्र आहे. (Pune News)
उमेदवारांचा उत्स्फूर्त प्रतिसाद
यंदा पुणे शहर पोलिस दलात एकूण सुमारे 2000 पदांसाठी भरती केली जात आहे. यामध्ये 1733 पोलिस शिपाई, 105 वाहनचालक, 33 बँडसमन आणि कारागृह विभागातील 130 शिपाई पदांचा समावेश आहे. या पदांसाठी ऑनलाइन अर्ज करण्याची अंतिम तारीख सुरुवातीला 30 नोव्हेंबर होती. मात्र उमेदवारांचा वाढता प्रतिसाद पाहता अर्ज करण्याची मुदत 7 डिसेंबरपर्यंत वाढविण्यात आली होती. (Breaking News)
शहराची निवड करणं बंधनकारक
राज्यात मुंबई, पुणे, पिंपरी-चिंचवडसह विविध ठिकाणी एकाच दिवशी पोलिस भरती प्रक्रिया राबविण्यात येणार आहे. पोलिस शिपाई पदासाठी एकापेक्षा जास्त ठिकाणी अर्ज केलेल्या उमेदवारांना केवळ एकाच शहरात हजर राहावे लागणार आहे. त्यामुळे उमेदवारांना शहराची निवड करणे बंधनकारक असणार आहे. अर्जांची छाननी झाल्यानंतर पात्र उमेदवारांना इ-मेलद्वारे माहिती दिली जाणार आहे. त्यानंतर अंतिम उमेदवारांची यादी जाहीर केली जाणार आहे. (Marathi News)
मैदानी चाचणीनंतर लेखी परीक्षा
कारागृह शिपाई पदासाठीची भरतीही पुणे शहर पोलिस दलामार्फतच घेण्यात येणार आहे. मैदानी चाचणीनंतर लेखी परीक्षा घेतली जाणार असल्याची माहिती पोलिस प्रशासनाने दिली आहे. निवड प्रक्रिया लेखी परीक्षा, शारीरिक चाचणी (उंची, छाती, धावणे), कागदपत्रांची पडताळणी आणि वाहनचालक पदासाठी कौशल्य चाचणी अशा टप्प्यांत पार पडणार आहे. (Marathi Batmya)
हेही वाचा: भोसरीच्या ‘त्या’ जमीन व्यवहार प्रकरणात एकनाथ खडसेंना विशेष न्यायालयाचा दणका; प्रकरण काय?
दरम्यान, स्थानिक स्वराज्य संस्थांच्या निवडणुकांच्या पार्श्वभूमीवर भरतीची पुढील प्रक्रिया नेमकी कधी सुरू होणार, याकडे उमेदवारांचे लक्ष लागले आहे. भरती प्रक्रिया पूर्णपणे पारदर्शक राहावी यासाठी मैदानी चाचणीच्या ठिकाणी सीसीटीव्ही आणि व्हिडिओ कॅमेरे लावण्यात येणार असल्याचे अतिरिक्त पोलिस आयुक्त (प्रशासन) संजय पाटील यांनी स्पष्ट केले आहे. उमेदवारांनी कोणत्याही खोट्या आश्वासनांना बळी पडू नये, तसेच फसवणूक झाल्यास पोलिस आयुक्त कार्यालय किंवा लाचलुचपत प्रतिबंधक विभागाकडे तक्रार करावी, असे आवाहनही त्यांनी केले आहे.
