पुणे : खडकवासला परिसरातील गोऱ्हे बुद्रुक येथे साखरपुड्याच्या कार्यक्रमासाठी आलेल्या पाहुण्यांच्या कारमधून लाखो रुपयांचा ऐवज चोरीला गेल्याची धक्कादायक घटना घडली आहे. हॉटेलबाहेर पानशेत रस्त्यालगत पार्क केलेल्या चारचाकी वाहनाला अज्ञात चोरट्यांनी लक्ष्य केले. कारमधील सुमारे सहा तोळे सोन्याचे दागिने आणि एक आयपॅड असा अंदाजे साडेसात लाख रुपयांचा ऐवज चोरून नेण्यात आला. याप्रकरणी हवेली पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, गोऱ्हे बुद्रुक येथील एका हॉटेलमध्ये नातेवाईकांचा साखरपुड्याचा कार्यक्रम आयोजित करण्यात आला होता. या कार्यक्रमासाठी आलेल्या पाहुण्यांनी आपली चारचाकी कार पानशेत रस्त्यालगत पार्क केली होती आणि ते कार्यक्रमासाठी हॉटेलमध्ये गेले होते.
कार्यक्रम सुरू असतानाच अज्ञात चोरट्यांनी संधी साधत कारमधील मौल्यवान वस्तूंवर हात साफ केला. चोरट्यांनी कारमध्ये ठेवलेले सुमारे सहा तोळे सोन्याचे दागिने आणि एक आयपॅड असा एकूण अंदाजे साडेसात लाख रुपयांचा ऐवज लंपास केला.

कार्यक्रम संपल्यानंतर पाहुणे कारजवळ आले असता चोरीचा प्रकार उघडकीस आला. कारमधील सोन्याचे दागिने आणि आयपॅड गायब असल्याचे लक्षात येताच त्यांना धक्का बसला. साखरपुड्यासारख्या आनंदाच्या कार्यक्रमात घडलेल्या या घटनेमुळे उपस्थितांमध्ये खळबळ उडाली.
घटनेनंतर संबंधितांनी हवेली पोलीस ठाण्यात तक्रार दाखल केली. पोलिसांनी परिसरातील सीसीटीव्ही फुटेज तपासण्यास सुरुवात केली असून, तांत्रिक माहितीच्या आधारे अज्ञात चोरट्यांचा शोध घेतला जात आहे.
दरम्यान, लग्न, साखरपुडा किंवा अन्य गर्दीच्या कार्यक्रमांना जाताना कारमध्ये सोन्या-चांदीचे दागिने आणि इतर मौल्यवान वस्तू ठेवू नयेत, असे आवाहन पोलिसांकडून करण्यात येत आहे.






