मुंबई : अजित पवार यांच्या विमान अपघाताच्या प्रकरणावरून महाराष्ट्रातील राजकीय वातावरण पुन्हा तापले आहे. राष्ट्रवादी काँग्रेसच्या शरद पवार गटाचे आमदार रोहित पवार यांनी मुख्यमंत्री देवेंद्र फडणवीस यांच्यावर गंभीर आरोप केले होते. या प्रकरणातील संभाव्य दोषींना वाचवण्याचा प्रयत्न होत असल्याचा दावा त्यांनी केला होता. त्यांच्या या आरोपांना आता भाजपचे प्रवक्ते नवनाथ बन यांनी प्रत्युत्तर दिले आहे. तसेच अपघाताच्या कारणांबाबत रोहित पवार यांच्या साखर कारखान्याचा संदर्भ देत चौकशीची मागणी केली आहे.

रोहित पवार यांनी पत्रकार परिषदेत मुख्यमंत्री देवेंद्र फडणवीस यांचा मफलर घातलेला फोटो दाखवत त्यांच्यावर टीका केली होती. विमान अपघाताच्या तपासात काही जणांना संरक्षण दिले जात असल्याचा आरोपही त्यांनी केला होता. मात्र, फडणवीस यांचा अपघाताच्या कटाशी थेट संबंध असल्याचा आरोप आपण केलेला नसल्याचेही त्यांनी स्पष्ट केले होते.
यानंतर नवनाथ बन यांनी बारामती विमानतळ परिसरातील दृश्यमानतेचा मुद्दा उपस्थित केला. अपघाताच्या दिवशी सकाळी धुक्यामुळे किंवा धुरामुळे विमानतळ परिसरातील दृश्यमानता कमी झाली होती का, याची तपासणी करण्याची मागणी त्यांनी केली. रोहित पवार यांच्या शेटफळगढे येथील साखर कारखान्यातून निघणाऱ्या धुराचा यामागे काही संबंध आहे का, असा सवाल त्यांनी उपस्थित केला. मात्र, कारखान्याच्या धुरामुळेच अपघात झाला, याचा कोणताही निष्कर्ष अद्याप समोर आलेला नाही.

नवनाथ बन यांनी या प्रकरणाची सखोल चौकशी करण्याची मागणी मुख्यमंत्री आणि तपास यंत्रणांकडे केली आहे. यावेळी त्यांनी रोहित पवार यांच्या राजकीय भूमिकेवरही टीका केली. दरम्यान, रोहित पवार यांनी विमान कंपनी आणि अपघातासंदर्भात उपस्थित केलेल्या प्रश्नांवरूनही भाजपने त्यांच्यावर टीका केली आहे. त्यामुळे अजित पवार यांच्या विमान अपघाताचा तपास आणि त्यावरून सुरू झालेले राजकीय आरोप-प्रत्यारोप पुन्हा चर्चेत आले आहेत.







