पुणे: मोबाईलवर मटक्याचे आकडे स्वीकारून जुगार चालवणाऱ्या आरोपीला अतिरिक्त सत्र न्यायालयाकडून अटकपूर्व जामीन मंजूर करण्यात आला आहे. अतिरिक्त सत्र न्यायालयाच्या न्यायाधीश सौ. एस. एस. सस्ते यांच्या कोर्टाने हे आदेश पारित केल्याची माहिती आरोपीचे वकील अॅड. जितेंद्र अशोक जानापुरकर यांनी दिली. सुहास विठ्ठल गायकवाड ऊर्फ इडली अण्णा (रा. भवानी पेठ, स्वारगेट) असे जामीन मंजूर झालेल्या आरोपीचे नाव आहे. (Pune News)
मिळालेल्या माहितीनुसार, 26 जून 2025 रोजी खडक पोलिस ठाण्याच्या हद्दीत पोलीस गस्त घालीत असताना पोलिस शिपाई आशिष चव्हाण यांना बातमीदारामार्फत माहिती मिळाली की, सहारा कॉम्प्लेक्सच्या समोर घोरपडी पेठ पुणे येथे सार्वजनिक रोडवर आबोली शर्ट घातलेला व निळया रंगाची पॅन्ट घातलेला एक इसम मोबाईल वरती मटक्याचे आकड्याचे बुकींग घेवून मटका जुगार घेत आहे. मिळालेल्या माहितीनुसार पोलिसांनी त्या ठिकाणी धाड टाकून आरोपी सुहास गायकवाडला रंगेहाथ ताब्यात घेतले. (Pune Crime)
आरोपीकडील मोबाईलची पंचासमक्ष तपासणी केली असता, 35 जणांच्या मोबाईल नंबरवर मटक्याचे आकडे पाठवून बुकींग घेतल्याचे दिसून आले. तसेच ऑनलाइन पेमेंटचे व्यवहारही आढळून आले. आरोपीकडून मोबाईल आणि काही रोकड जप्त करण्यात आली. या प्रकरणात आरोपीवर महाराष्ट्र जुगार प्रतिबंधक अधिनियम 1887 चे कलम 12(ए) आणि भारतीय न्याय संहिता 2023 चे कलम 112 अंतर्गत गुन्हा नोंदविण्यात आला होता.
या गुन्ह्यात जामीन मिळण्याकामी आरोपीने ॲड. जितेंद्र अशोक जानापुरकर यांच्या मार्फत मे. न्यायालयात अर्ज केला होता. जामीन अर्जाच्या सुनावणी दरम्यान ॲड. जितेंद्र अशोक जानापुरकर यांनी युक्तिवाद करून आरोपीची बाजू मांडली. त्याचप्रमाणे सरकारी वकील यांनी जामीन मिळू नये म्हणून बाजू मांडली.
दरम्यान, न्यायालयाने दोन्ही बाजूचा युक्तिवाद ऐकला आणि सर्व बाजूंचा विचार करतान्यायालयाने अर्जदार आरोपीचा अटी व शर्तीवर अटकपूर्व जामीन मंजूर केला. या प्रकरणात ॲड. स्वप्नील दाभाडे, ॲड. अफरोज जहागीरदार, ॲड. मयूर चौधरी, ऋषिकेश पाटील, यांनी सहकार्य केले.
