Satara : पुणे-बंगळुरू राष्ट्रीय महामार्गावरच्या सातारा येथील बॉम्बे रेस्टॉरंट परिसरात गुरुवारी दुपारी झालेल्या अपघाताने सर्वांचे हृदय पिळवटून निघाले. दुचाकीवर शिकवणीसाठी जात असलेल्या दोन महिलांना उसाने भरलेल्या ट्रॅक्टरने धडक दिली. यात दुचाकीवर मागे बसलेल्या सारिका सुतार यांचा जागीच दुर्दैवी मृत्यू झाला, तर त्यांच्या सोबत असलेल्या ईश्वरी सुतार गंभीर जखमी झाल्या.
मिळालेल्या माहितीनुसार, सारिका सुतार अजंठा चौकातील खासगी क्लासमध्ये शिकवण्यासाठी जात होत्या. बॉम्बे रेस्टॉरंटजवळ त्यांच्या दुचाकीसमोरून उसाचा ट्रॅक्टर येत असतानाच, सर्व्हिस रोडवर वळण्यासाठी एक क्रेटा कार अचानक पुढे आली. कारला वाचवताना ट्रॅक्टर चालकाने वाहन उजवीकडे खेचले आणि दुचाकी मोठ्या खड्ड्यात आपटली. त्या धक्क्याने सारिका खाली पडल्या आणि त्यांच्या डोक्यावरून ट्रॅक्टर-ट्रॉलीचे चाक गेल्याने त्यांचा जागीच मृत्यू झाला.
या अपघातानंतर परिसरात मोठी खळबळ उडाली आहे. स्थानिक नागरिकांनी पुन्हा एकदा बॉम्बे रेस्टॉरंट परिसरातील अव्यवस्थित वाहतूक आणि बेकायदेशीर पार्किंगचा प्रश्न जोरात उपस्थित केला आहे. सर्व्हिस रोडच्या दोन्ही बाजूंना मोठ्या वाहनांचे अनधिकृत पार्किंग झाल्यामुळे रस्ता अरुंद होतो आणि अशा प्रकारचे अपघात टाळणे कठीण होते, अशी नाराजी व्यक्त केली जात आहे.
