मुंबई: नात्यांमधील विश्वास हाच आयुष्याचा आधार असतो, पण याच विश्वासाचा फायदा घेऊन एका फॅशन डिझायनरने क्रूर कृत्य केल्याचा धक्कादायक प्रकार मीरा रोड परिसरातून समोर आला आहे. लग्नाचे खोटे स्वप्न दाखवून एका महिलेचे शारीरिक व मानसिक शोषण केल्याप्रकरणी संबंधित फॅशन डिझायनरवर गुन्हा दाखल करण्यात आला आहे.
मिळालेल्या माहितीनुसार, मीरा रोड येथील एका सोसायटीत राहणाऱ्या महिलेची ओळख तेथेच राहणाऱ्या जय मारु या फॅशन डिझायनरशी झाली. ओळखीचे रूपांतर मैत्रीत झाल्यानंतर आरोपीने हळूहळू या महिलेचे विश्वास संपादन केले. त्यानंतर, “मी तुझ्याशी लग्न करतो,” असे खोटे आश्वासन देऊन त्याने महिलेला जाळ्यात अडकवले. या विश्वासाचा गैरफायदा घेऊन आरोपीने तिला वेगवेगळ्या ठिकाणी नेऊन तिच्यावर वारंवार अत्याचार केले.
या प्रकरणातील सर्वात संतापजनक बाब म्हणजे आरोपी जय मारु हा आधीच विवाहित असल्याचे निष्पन्न झाले आहे. त्याने ही बाब पीडित महिलेपासून सुरुवातीपासूनच लपवून ठेवली होती. अखेर आपली फसवणूक झाल्याचे लक्षात येताच महिलेने पोलिसांत धाव घेतली.
काशिगाव पोलीस ठाण्यात पीडितेने केलेल्या तक्रारीनंतर पोलिसांनी आरोपी जय मारु याच्यावर विविध गंभीर कलमांखाली गुन्हा दाखल केला आहे. या प्रकरणाचा पुढील तपास पोलीस करत आहे.
