राहुलकुमार अवचट
दौंड: दौंड शहरातील शालीमार चौक परिसरात सुरू असलेल्या बेकायदेशीर मटका जुगार अड्ड्यावर दौंड पोलिसांनी कारवाई करत दोघांविरुद्ध गुन्हा दाखल केला आहे. या कारवाईत रोख रक्कम आणि जुगाराशी संबंधित साहित्य असा एकूण 1,205 रुपये किमतीचा मुद्देमाल जप्त करण्यात आला.
पोलिसांनी दिलेल्या माहितीनुसार, 18 जून 2026 रोजी दुपारी सुमारे 12:30 वाजण्याच्या सुमारास शालीमार चौकातून भावना हॉटेलकडे जाणाऱ्या रस्त्यावरील कोहिनूर अपार्टमेंटच्या मागील बाजूस बेकायदेशीरपणे कल्याण मटका जुगार सुरू असल्याची माहिती पोलिसांना मिळाली होती. त्यानुसार पोलिसांनी घटनास्थळी छापा टाकला.
या कारवाईत चंदू राम नगरकर (रा. कोहिनूर अपार्टमेंटमागे, दौंड) हा ओळखीच्या लोकांकडून पैसे घेऊन बिनपरवानगी कल्याण मटका जुगार खेळत व खेळवत असल्याचे आढळून आले. तसेच जुगारातून जमा झालेली रक्कम आणि व्यवहार पुढे विल्यम अँटोनी आरीकम (वय 65, रा. दत्तमंदिर परिसर, दौंड) याच्याकडे दिली जात असल्याची माहितीही तपासात समोर आली.
मिळालेल्या माहितीनंतर पोलिसांनी तात्काळ कारवाई करत दोघांना ताब्यात घेतले. घटनास्थळावरून रोख रक्कम व इतर साहित्य जप्त करण्यात आले असून त्याची एकूण किंमत 1,205 रुपये असल्याचे पोलिसांनी सांगितले.
या प्रकरणी पोलिस हवालदार अमिर जिलानी शेख यांनी सरकारतर्फे फिर्याद दिली आहे. त्यानुसार चंदू राम नगरकर आणि विल्यम अँटोनी आरीकम या दोघांविरुद्ध महाराष्ट्र जुगार प्रतिबंधक अधिनियमाच्या कलम 12(अ) अंतर्गत दौंड पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलिस हवालदार निकम करत आहेत.
