यवत : शेतात बसलेल्या एका 65 वर्षीय वृद्ध महिलेला “मावशी, साप आला” अशी भीती दाखवून त्यांच्या गळ्यातील सोन्याचे दागिने बळजबरीने हिसकावून पसार झालेल्या भामट्यांचा छडा यवत पोलिसांनी अवघ्या काही दिवसांत लावला आहे. पोलिसांनी या प्रकरणी एका सराईत आरोपीला बेड्या ठोकल्या असून, त्याच्याकडून चोरीला गेलेले 6 ग्रॅम सोन्याचे दागिने आणि गुन्ह्यात वापरलेली दुचाकी असा एकूण 95 हजार रुपयांचा मुद्देमाल हस्तगत केला आहे.
सुमित उर्फ घा-या ईश्वर साळुंखे (वय 19, रा. बोरीपार्धी, ता. दौंड,) असे अटक करण्यात आलेल्या आरोपीचे नाव आहे.पोलिसांनी दिलेल्या माहितीनुसार, 09 ऑगस्टला दुपारी अडीच वाजण्याच्या सुमारास दापोडी (ता. दौंड) गावच्या हद्दीतील शेतात सुनंदा बापू रूपनवर (वय 65) या ऊस पिकाची लागवड करून झाडाखाली विश्रांतीसाठी बसल्या होत्या. त्याच वेळी आरोपी सुमित उर्फ घा-या साळुंखे हा आपल्या दोन अनोळखी साथीदारांसह होंडा शाईन दुचाकीवरून तेथे आला.
त्यातील दोघांनी आजींजवळ जाऊन “मावशी, साप आला!” असे मोठ्याने सांगून त्यांना प्रचंड घाबरवले. भीतीपोटी सुनंदा रूपनवर पळू लागल्या असता, तिन्ही भामट्यांनी त्यांचा पाठलाग करून त्यांच्या गळ्यातील सोन्याचे डोरले व काळ्या मण्यांची पोत जबरदस्तीने हिसकावून घेतली आणि दुचाकीवरून सुसाट पसार झाले. या प्रकरणी यवत पोलीस ठाण्यात जबरी चोरीचा गुन्हा दाखल करण्यात आला होता.
गुन्ह्याचे गांभीर्य ओळखून यवत पोलीस ठाण्याच्या पथकाने घटनास्थळासह परिसरातील सीसीटीव्ही फुटेज, तांत्रिक विश्लेषण आणि गोपनीय माहितीच्या आधारे कसून तपास सुरू केला. अत्यंत कौशल्याने तपास करत पोलिसांनी अवघ्या काही दिवसांत आरोपी सुमित उर्फ घा-या साळुंखे याला बोरीपार्धी येथून ताब्यात घेतले.
दरम्यान, त्याच्याकडून पोलिसांनी दुचकिसह चोरीला गेलेल्या मुद्देमालासह 95 हजार रुपयांचा मुद्देमाल जप्त करण्यात आला आहे. चोरीस गेलेले सोन्याचे दागिने सुरक्षितपणे परत मिळाल्याने वृद्ध महिला सुनंदा रूपनवर यांनी भावूक होऊन यवत पोलिसांचे मनापासून आभार मानले.
उर्वरित दोन साथीदारांचा शोध सुरू…
या गुन्ह्यातील इतर दोन अनोळखी पसार आरोपींचा यवत पोलीस गांभीर्याने शोध घेत आहेत. सदरची यशस्वी कामगिरी वरिष्ठांच्या यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, सहाय्यक पोलीस निरीक्षक आबा गाढवे, पोलीस उपनिरीक्षक मारोती मैतलवाड, पोलीस उपनिरीक्षक बाळकृष्ण गाडेकर, पोलीस हवालदार रॉकी देवकाते, संदीप देवकर, अमोल काळे, पोलीस शिपाई धीरज जाधव, अमोल भुजबळ, सचिन गुंड, प्रतीक धीवार, प्रतीक जगताप, विकास मोरे, दिनेश लोणकर व विनीत कुऱ्हाडे यांच्या पथकाने केली. या गुन्ह्याचा पुढील सखोल तपास पोलीस उपनिरीक्षक बाळकृष्ण गाडेकर करत आहेत.
