पुणे : राजधानी दिल्लीतील आंदोलनाच्या यशानंतर कॉक्रोच जनता पार्टीचे अध्यक्ष अभिजीत दीपके लवकरच पोलीस प्रशासनात सुधारणा घडवून आणण्यासाठी नवीन मोहीम सुरू करण्याच्या तयारीत असल्याची शक्यता वर्तवली जात आहे.
नुकतेच एका विद्यार्थिनीच्या वडिलांना मारहाण करणाऱ्या स्वतंत्र भारद्वाज याच्यावर कारवाई करण्यासाठी पक्षाने दिल्ली पोलीस ठाण्यात जोरदार निदर्शने केली होती. या आंदोलनानंतर पोलिसांनी बुलंदशहरमधून आरोपीला अटक केली असून त्याच्यावर अॅट्रॉसिटी कायद्यानुसार गुन्हा नोंदवला आहे. या घटनेचा संदर्भ देत दीपके यांनी सोशल मीडियावर (X) पोलिसांच्या ढिम्म कारभारावर टीका केली.
एका गुंडावर गुन्हा दाखल करायला पोलिसांना दोन महिने आणि एक आंदोलन लागणे हे संतापजनक असून आता पोलीस विभागात मोठ्या सुधारांची गरज असल्याचे त्यांनी स्पष्ट केले आहे.शिक्षण क्षेत्रातील या आक्रमक भूमिकेनंतर आता कॉक्रोच जनता पार्टी पोलीस सुधारणांसाठी नवे आंदोलन उभे करणार का, याकडे सर्वांचे लक्ष लागले आहे.
याआधी पक्षाने जंतर-मंतरवर महिनाभर केलेल्या आंदोलनामुळे केंद्रीय शिक्षणमंत्री धर्मेंद्र प्रधान यांना राजीनामा द्यावा लागला होता. या यशानंतर पक्षाने ‘स्कूल ठीक करो’ मोहीम हाती घेतली होती. या अभियानासाठी अभिजीत दीपके यांनी महाराष्ट्रातील विविध जिल्ह्यांचा दौरा करून शैक्षणिक समस्यांवर प्रकाश टाकला होता.
नाशिकमध्ये आंदोलन करणाऱ्या 100 आदिवासी विद्यार्थ्यांची भेट घेऊन दीपके यांनी त्यांच्या मागण्यांना पाठिंबा दिला. यातील तीन विद्यार्थ्यांनी उपोषण सुरू केले आहे. तिथल्या अस्वच्छ शौचालये, निकृष्ट भोजन आणि आरोग्य सुविधांच्या दुरवस्थेवर त्यांनी तीव्र नाराजी व्यक्त केली. आदिवासी आश्रमशाळांची प्रत्यक्ष पाहणी करण्यासाठी मुख्यमंत्री देवेंद्र फडणवीस यांनी स्वतः दौरा करावा, अशी मागणीही त्यांनी केली.
