पुणे : आशियाई क्रीडा स्पर्धेत भारतीय महिला कबड्डी संघाने आपल्या उत्कृष्ट कौशल्याच्या बळावर सुवर्णपदक मिळवून देशाची मान अभिमानाने उंच केली आहे. अत्यंत चुरशीच्या ठरलेल्या अंतिम सामन्यात भारताने इराण संघाचा 37-34 असा पराभव करत चौथ्यांदा आशियाई सुवर्णमुकुट आपल्या नावावर केला.
अंतिम सामन्याच्या पहिल्या सत्रात भारतीय खेळाडूंनी आक्रमक सुरुवात करत 22-16 अशी 6 गुणांची मजबूत आघाडी घेतली होती. मात्र, दुसऱ्या सत्रात इराणने जबरदस्त पुनरागमन केले आणि दोन्ही संघांमधील फरक अवघ्या 1 गुणाचा (27-26) राहिला.
सामन्यातील शेवटची 8 मिनिटे शिल्लक असताना निर्माण झालेल्या प्रचंड दबावाच्या वेळी पूजा हथवाला भारतासाठी तारणहार ठरली. तिने मोक्याच्या क्षणी यशस्वी चढाया (रेड्स) मारून संघासाठी मौल्यवान गुण मिळवले. पूजाच्या या कामगिरीनंतर भारतीय बचाव फळीनेही इराणच्या रेडर्सना पकडून विजय निश्चित केला.इराणला 37-34 अशा फरकाने हरवून चौथे ऐतिहासिक सुवर्णपदक भारताने पटकावले.या दणदणीत विजयामुळे आशिया खंडात भारतीय महिला कबड्डीचा दबदबा पुन्हा एकदा सिद्ध झाला आहे.
दरम्यान 2010 मध्ये आशियाई खेळांमध्ये महिला कबड्डीचा समावेश झाल्यापासून भारतीय संघाने नेहमीच आपले वर्चस्व राखले आहे. भारताने खेळल्या गेलेल्या प्रत्येक मोसमात अंतिम फेरीत धडक मारून पदक जिंकण्याचा अभूतपूर्व विक्रम केला आहे:
2010 (गुआंगझोऊ): थायलंडचा 28-14 असा पराभव करत पहिले सुवर्ण.
2014 (इंचियोन): इराणचा 31-21 असा पराभव करून सलग दुसरे सुवर्ण.
2018 (जकार्ता): इराणकडून 24-27 अशी मात खाल्याने रौप्यपदक.
2023 (हांगझोऊ): चिनी ताइपेला 26-25 ने नमवून तिसरे सुवर्ण.
2026: इराणला 37-34 अशा फरकाने हरवून चौथे ऐतिहासिक सुवर्णपदक.
